អ្នកការទូតជាន់ខ្ពស់របស់សហភាពអឺរ៉ុប (EU) នៅថ្ងៃចន្ទ (ទី១៨ ខែវិច្ឆិកា) នេះ បានអះអាងថា លោកនឹងស្នើទៅកាន់សមាជិកនៃប្លុកនេះថា EU ត្រូវផ្អាកការសន្ទនានយោបាយរបស់ខ្លួនជាមួយអ៊ីស្រាអែល ដោយលើកឡើងពីទង្វើរបស់ប្រទេសនេះ ក្នុងសង្គ្រាម នៅតំបន់ហ្កាហ្សា។

លោក Josep Borrell បានប្រាប់អ្នកសារព័ត៌មាន នៅមុនកិច្ចប្រជុំ EU ថា៖ «មនុស្សជាច្រើនបានព្យាយាមបញ្ឈប់សង្រ្គាម នៅហ្កាហ្សា។ ក៏ប៉ុន្តែរឿងនេះមិនទាន់កើតឡើងនៅឡើយទេ។ ហើយក៏ខ្ញុំមិនឃើញពីក្ដីសង្ឃឹម ដើម្បីឲ្យរឿងនេះកើតឡើងបានដែរ។ នោះហើយជាមូលហេតុដែលយើងត្រូវដាក់សម្ពាធលើរដ្ឋាភិបាលអ៊ីស្រាអែល ហើយជាក់ស្តែងលើភាគីក្រុមហាម៉ាសផងដែរ»។

គួរបញ្ជាក់ថា បើយោងតាមអ្នកការទូត ៤រូប និងលិខិតមួយច្បាប់ ដែលសារព័ត៌មាន Reuters បានឃើញ បានឲ្យដឹងថា ប្រធានគោលនយោបាយការបរទេសរបស់ EU រូបនេះ កាលពីសប្តាហ៍មុន បានស្នើឲ្យប្លុកនេះផ្អាកការសន្ទនានយោបាយរបស់ខ្លួនជាមួយអ៊ីស្រាអែល ដោយលើកឡើងពីការរំលោភសិទ្ធិមនុស្សដែលអាចកើតមានក្នុងសង្គ្រាម នៅតំនប់ហ្កាហ្សា។

តែយ៉ាងណាក្ដី សញ្ញាមួយ បានបង្ហាញថា សំណើរបស់លោក នឹងមិនត្រូវបានស្វាគមន៍ដោយសមាជិក EU ទាំងអស់នោះទេ ដោយរដ្ឋមន្ត្រីការបរទេសហូឡង់ លោក Caspar Veldkamp បាននិយាយថា EU ចាំបាច់ត្រូវបន្តការសន្ទនារបស់ខ្លួនជាមួយអ៊ីស្រាអែល។ លោកបានប្រាប់ថា៖ «តាមការយល់ឃើញរបស់ប្រទេសហូឡង់ ទ្វារនេះគួរតែបន្តបើកចំហរជានិច្ច»៕