វិមានក្រឹមឡាំង និយាយនៅថ្ងៃចន្ទនេះថា ការសម្រេចចិត្តណាមួយរបស់សហរដ្ឋអាមេរិក អនុញ្ញាតឲ្យអ៊ុយក្រែនបាញ់មីស៊ីលអាមេរិកចូលទៅជ្រៅក្នុងទឹកដីរុស្ស៊ី នឹងមានន័យថា ពួកគេជាប់ពាក់ព័ន្ធដោយផ្ទាល់នៅក្នុងជម្លោះមួយនេះ ហើយនិងបានចោទប្រកាន់រដ្ឋបាលរបស់លោកប្រធានាធិបតី Joe Bidenថា កំពុងធ្វើឲ្យសង្រ្គាមឡើងកម្តៅ ។

រុស្ស៊ីបាននិយាយប្រាប់លោកខាងលិចអស់រយៈពេលច្រើនខែមកហើយថា ការសម្រេចចិត្តបែបនេះនឹងត្រូវបកស្រាយយ៉ាងដូចម្តេច ហើយវានឹងធ្វើឲ្យមានហានិភ័យនៃការប្រឈមដាក់គ្នាជាមួយសម្ព័ន្ធមិត្តណាតូដឹកនាំដោយសហរដ្ឋអាមេរិក ។

ពេលសួរពីសេចក្តីរាយការណ៍ចុះផ្សាយដោយកាសែត New York Times និងទីភ្នាក់ងារព័ត៌មានរ៉យទ័រថារដ្ឋបាលរបស់លោក Bidenបានសម្រេចចិត្តលើការវាយប្រហាររយៈចម្ងាយឆ្ងាយ អ្នកនាំពាក្យវិមានក្រឹមឡាំងលោក Dmitry Peskov បានកត់សំគាល់ថា សេចក្តីរាយការណ៍នោះ ពុំបានផ្អែកលើសេចក្តីថ្លែងការណ៍ផ្លូវការណាមួយនោះឡើយ ។ 

លោក Peskov និយាយថា បើសិនជាការសម្រេចចិត្តបែបនេះ ពិតជាត្រូវបានបង្កើតពិតមែន និងនាំទៅកាន់របបទីក្រុងគីវ ដល់ពេលនោះ វាគឺជាជុំថ្មីនៃភាពតានតឹង និងស្ថានភាពថ្មីពីទស្សនៈរួមនៃការជាប់ពាក់ព័ន្ធរបស់សហរដ្ឋអាមេរិកនៅក្នុងជម្លោះមួយនេះ ។

លោកបន្តថា លោកប្រធានាធិបតី Vladimir Putin បានបញ្ជាក់យ៉ាងច្បាស់ពីគោលជំហររបស់រុស្ស៊ី ពេលដែលលោកនិយាយនៅក្នុងទីក្រុង St Petersburg កាលពីខែកញ្ញា ។

លោក Putinបាននិយាយកាលពីថ្ងៃទី ១២ ខែកញ្ញាថា ការឯកភាពរបស់លោកខាងលិចសម្រាប់ជំហានបែបនេះ នឹងមានន័យថាជាការជាប់ពាក់ព័ន្ធដោយផ្ទាល់របស់ប្រទេសសមាជិកអង្គការណាតូ សហរដ្ឋអាមេរិក និងប្រទេសនៅអឺរ៉ុប នៅក្នុងសង្រ្គាមអ៊ុយក្រែន ពីព្រោះថា ហេដ្ឋារចនាសម្ព័ន្ធយោធាណាតូ និងបុគ្គលិករបស់ពួកគេ ត្រូវតែជាប់ពាក់ព័ន្ធក្នុងគោលដៅបាញ់មីស៊ីល ៕