លោក Muhammad Awad និងគ្រួសាររបស់លោកស្ថិតនៅក្នុងចំណោមគ្រួសារផ្សេងទៀត ដែលរត់គេចចេញពីកោះ Tuti របស់ស៊ូដង់នៅដើមឆ្នាំនេះ ស្របពេលមានការឡោមព័ទ្ធពីកងកម្លាំងគាំទ្ររហ័ស(RSF) ដោយស្វែងរកការស្នាក់នៅក្នុងទីជម្រក ក្រោយរស់រានអស់រយៈពេលជាច្រើនខែដោយសារអាហារមិនគ្រប់គ្រាន់ និងប្រឈមហានិភ័យជំងឺច្រើន ។

 កោះនៅកណ្តាលទន្លេនីលមួយនេះ បានក្លាយជាកន្លែងបំផ្លិចបំផ្លាញដោយសារសង្រ្គាម ដែលបានចាប់ផ្តើមកាលពីខែមេសា ឆ្នាំ ២០២៣ ។

 កាន់កូនក្នុងដៃនៅជំរំសម្រាប់មនុស្សជម្លៀសខ្លួនស្ថិតក្នុងទីក្រុង Omdurman និងជាជំរំគ្រប់គ្រងដោយកងទ័ពស៊ូដង់ លោក Awad និយាយថា គ្មានអាហារឆ្ងាញ់នោះទេ មានជំងឺច្រើនណាស់ គ្មានកន្លែងដេក គ្មានកន្លែងសុវត្ថិភាពនោះទេ ។

 ដោយឡែក អ្នកស្រី Sarah Siraj ដែលបានចាកចេញជាមួយកូន ២នាក់របស់គាត់ និយាយថា មនុស្ស ៦-៧នាក់ បានស្លាប់រាល់ថ្ងៃ ហើយអ្នកស្រីទើបតែអាចព្យាយាបាលជំងឺគ្រុនឈាមកូនរបស់គាត់ទេ ពេលអ្នកស្រី ធ្វើដំណើរមកដល់ទីក្រុង Omdurman ។

 យោងតាមក្រុមអ្នកជំនាញ បានឲ្យដឹងថា កោះ Tuti ស្ថិតក្នុងចំណោមតំបន់ចំនួន ១៤នៅទូទាំងប្រទេសស៊ូដង់ ប្រឈមហានិភ័យនៃគ្រោះទុរ្ភិក្ស ហើយជំងឺគ្រុនឈាម បានញាំញីកោះមួយនេះ ។

 មនុស្សជាង ៦១.០០០នាក់ ត្រូវបានគេប៉ាន់ប្រមាណថា បានស្លាប់នៅក្នុងរដ្ឋ Khartoum អំឡុងរយៈពេល ១៤ខែដំបូងនៃសង្រ្គាមស៊ូដង់ ពោលគឺតួលេខច្រើនជាងការកត់ត្រាលើកមុន ៕