ប្រធានាធិបតីប៉ូឡូញ លោក Andrzej Duda នៅថ្ងៃចន្ទ (ទី១៨ ខែវិច្ឆិកា) នេះ បាននិយាយថា នេះអាចជាពេលវេលាផ្លាស់ប្ដូរដ៏សំខាន់មួយ នៅក្នុងសង្គ្រាម បន្ទាប់ពីទីក្រុងវ៉ាស៊ីនតោនសម្រេចអនុញ្ញាតឲ្យប្រទេសអ៊ុយក្រែនប្រើប្រាស់អាវុធដែលផលិតដោយសហរដ្ឋអាមេរិក ដើម្បីវាយប្រហារចូលជ្រៅទៅក្នុងប្រទេសរុស្ស៊ី។

គួរបញ្ជាក់ថា មន្ត្រីអាមេរិក ២នាក់ និងប្រភពដែលដឹងអំពីការសម្រេចនោះ បានបង្ហាញពីការកែប្រែដ៏ធំនៃគោលនយោបាយរបស់ទីក្រុងវ៉ាស៊ីនតោន នៅក្នុងជម្លោះអ៊ុយក្រែន និងរុស្ស៊ី កាលពីថ្ងៃអាទិត្យ (ទី១៧ ខែវិច្ឆិកា)។

លោក Duda បានប្រាប់អ្នកសារព័ត៌មានថា៖ «ការសម្រេចនេះ គឺចាំបាច់ណាស់។ រុស្ស៊ីមើលឃើញថា អ៊ុយក្រែនទទួលបានការគាំទ្រយ៉ាងខ្លាំង និងថា ជំហររបស់ប្រទេសលោកខាងលិច គឺឥតងាករេ និងប្ដូរផ្ដាច់ណាស់។ វាជាពេលវេលាដ៏សំខាន់ណាស់ និងជាការសម្រេចចិត្តដ៏មានសក្តានុពល នៅក្នុងសង្រ្គាមនេះ»។

ជាមួយគ្នានេះ លោកក៏បានរិះគន់ប្រទេសអាល្លឺម៉ង់ផងដែរ ដែលនិយាយថា ខ្លួននឹងមិនតម្រឹមគោលនយោបាយរបស់ខ្លួនជាមួយសហរដ្ឋអាមេរិក ហើយបានសម្តែងការមិនពេញចិត្ត ចំពោះការជជែកតាមទូរសព្ទរបស់អធិការបតីអាល្លឺម៉ង់ លោក Olaf Scholz ជាមួយប្រធានាធិបតីរុស្ស៊ី លោក Vladimir Putin កាលពីថ្ងៃសុក្រសប្តាហ៍មុន៕