ពលរដ្ឋរុស្ស៊ីរស់នៅទីក្រុងម៉ូស្គូ ដែលត្រូវបានសម្ភាសន៍ដោយទីភ្នាក់ងារព័ត៌មានរ៉យទ័រនៅព្រឹកថ្ងៃចន្ទនេះ បាននិយាយថា ពួកគេខឹងសម្បារ និងព្រួយបារម្ភចំពោះការសម្រេចចិត្តរបស់ប្រធានាធិបតីសហរដ្ឋអាមេរិកលោក Joe Biden អនុញ្ញាតឲ្យអ៊ុយក្រែនប្រើប្រាស់អាវុធផលិតនៅសហរដ្ឋអាមេរិក វាយប្រហារចូលទៅជ្រៅក្នុងប្រទេសរុស្ស៊ី ។

លោក Alexander វ័យ ៧១ឆ្នំា និយាយថា រុស្ស៊ីគួរតែវាយបកទៅវិញលើមូលដ្ឋានទ័ពសហរដ្ឋអាមេរិក និងអង្គការណាតូ ជាការឆ្លើយតបនឹងការវាយប្រហារដោយមីស៊ីលល្បឿនលឿនជាងសំឡេង ។

ចំណែកឯនាង Anastasiya វ័យ ១៨ឆ្នាំ ដែលទើបផ្លាស់ទីលំនៅមកកាន់ទីក្រុងម៉ូស្គូ ពីទីក្រុង Sevastopol និយាយថា នាងធ្លាប់ឆ្លងកាត់ការប្រកាសអាសន្នដែនអាកាសញឹកញាប់នៅទីនោះ ដូច្នេះហើយដំណឹងមួយនេះ ធ្វើឲ្យនាងភិតភ័យព្រួយបារម្ភខ្លាំងណាស់ ។

ប្រធានាធិបតីរុស្ស៊ីលោក Wladimir Putinបាននិយាយកាលពីថ្ងៃទី ១២ ខែកញ្ញាថា ការឯកភាពរបស់លោកខាងលិចសម្រាប់ជំហានបែបនេះ នឹងមានន័យថាជាការជាប់ពាក់ព័ន្ធដោយផ្ទាល់របស់ប្រទេសសមាជិកអង្គការណាតូ សហរដ្ឋអាមេរិក និងប្រទេសនៅអឺរ៉ុប នៅក្នុងសង្រ្គាមអ៊ុយក្រែន ពីព្រោះថា ហេដ្ឋារចនាសម្ព័ន្ធយោធាណាតូ និងបុគ្គលិករបស់ពួកគេ ត្រូវតែជាប់ពាក់ព័ន្ធក្នុងគោលដៅបាញ់មីស៊ីល ។

កាលពីចុងខែតុលា លោក Putinនិយាយថា ក្រសួងការពារជាតិរុស្ស៊ី កំពុងធ្វើការលើមធ្យោបាយជាច្រើន ដើម្បីឆ្លើយតប បើសិនជាសហរដ្ឋអាមេរិក និងសម្ព័ន្ធមិត្តអង្គការណាតូ ជួយអ៊ុយក្រែនវាយប្រហារចូលកាន់តែជ្រៅទៅក្នុងដែនដីរុស្ស៊ី ដោយប្រើប្រាស់មីស៊ីលរយៈចម្ងាយឆ្ងាយផ្គត់ផ្គង់ដោយលោកខាងលិច ៕