ក្រុមមន្ត្រីគ្រប់គ្រងហានិភ័យ បាននិយាយកាលពីថ្ងៃចន្ទ (១៨ វិច្ឆិកា) ថា រដ្ឋាភិបាលនៃប្រទេសអេក្វាឌ័រ បានប្រកាសគ្រាអាសន្នជាតិរយៈពេល ៦០ថ្ងៃ ដោយសារចំហេះព្រៃដែលកំពុងឆាបឆេះកាន់តែអាក្រក់ទៅៗ និងគ្រោះរាំងស្ងួតធ្ងន់ធ្ងរ។

ប្រទេសនៅអាមេរិកខាងត្បូងមួយនេះប្រឈមមុខនឹងចំហេះព្រៃសកម្មចំនួន ១៣កន្លែង និង ៩កន្លែងផ្សេងទៀតដែលត្រូវបានគ្រប់គ្រង នេះបើយោងតាមការធ្វើបច្ចុប្បន្នភាពពីការិយាល័យទំនាក់ទំនងរបស់រដ្ឋាភិបាល។

ប្រធានគ្រប់គ្រងហានិភ័យ លោក ហ័រហេ ការីឡូ (Jorge Carrillo) បានប្រាប់វិទ្យុក្នុងស្រុកថា "ប្រទេសទាំងមូលកំពុងទទួលរងការបំផ្លិចបំផ្លាញនៃគ្រោះរាំងស្ងួតដ៏ធំដែលបានអូសបន្លាយជិត ១២០ ថ្ងៃរួចមកហើយ រួមទាំងចំហេះព្រៃដ៏រីករាលដាល"។

នៅក្នុងខេត្តដែលរងផលប៉ះពាល់ខ្លាំងជាងគេគឺ អាហ្សួយ (Azuay) និង ឡូហា (Loja) អណ្តាតភ្លើងបានលេបត្របាក់ផ្ទៃដីជាង ១០.០០០ហិកតា។ ក្រឹត្យ​គ្រាអាសន្ន​នេះកើត​ឡើង​ខណៈ​ដែល​អេក្វាឌ័រ​ ជួប​វិបត្តិ​ថាមពល​ដែល​នាំ​ឱ្យ​ដាច់​អគ្គិសនី​រហូត​ដល់ ១៤ម៉ោង​ក្នុង​មួយ​ថ្ងៃ​ក្នុង​រយៈពេល​ប៉ុន្មាន​ខែ​ថ្មីៗ​នេះ៕