ទូរទស្សន៍រដ្ឋចិន CCTV បានរាយការណ៍កាលពីថ្ងៃចន្ទ ១៨ វិច្ឆិកា ថាលោកប្រធានាធិបតីចិន Xi Jinping បានប្រកាសវិធានការដែលបង្កើតឡើងដើម្បីគាំទ្រដល់ក្រុមប្រទេសកំពុងអភិវឌ្ឍន៍សកលខាងត្បូង ឬ 'Global South' នៅឯការជួបជុំក្រុមមេដឹកនាំនៃក្រុមប្រទេសសេដ្ឋកិច្ចធំៗចំនួន ២០ ឬ G20 ក្នុងទីក្រុង Rio de Janeiro ប្រទេសប្រេស៊ីល ។

នៅក្នុងសុន្ទរកថាដំបូងរបស់លោកនៅឯកិច្ចប្រជុំកំពូល G20 លោក Xi បាននិយាយថា ប្រទេសចិននឹងគាំទ្រដល់ការអភិវឌ្ឍន៍ពិភពលោកជាមួយនឹងសកម្មភាពចំនួនប្រាំបី រួមទាំងការកសាងគំនិតផ្តួចផ្តើមខ្សែក្រវាត់ និងផ្លូវប្រកបដោយគុណភាពខ្ពស់ ជាផែនការគោលនយោបាយការបរទេសហត្ថលេខីរបស់លោក ដែលដឹកនាំការវិនិយោគរបស់ចិនដ៏ធំទៅកាន់គម្រោងហេដ្ឋារចនាសម្ព័ន្ធក្នុងប្រទេសកំពុងអភិវឌ្ឍន៍លើពិភពលោក។

លោកក៏បានប្រកាសថាប្រទេសចិន រួមជាមួយប្រទេសប្រេស៊ីល អាហ្រ្វិកខាងត្បូង និងសហភាពអាហ្រ្វិក កំពុងចាប់ផ្តើមគំនិតផ្តួចផ្តើមកិច្ចសហប្រតិបត្តិការអន្តរជាតិផ្នែកវិទ្យាសាស្ត្របើកចំហ ដែលត្រូវបានបង្កើតឡើងដើម្បីជំរុញផ្នែកនវានុវត្តន៍វិទ្យាសាស្ត្រ និងបច្ចេកវិទ្យាទៅកាន់ក្រុមប្រទេសកំពុងអភិវឌ្ឍន៍សកលខាងត្បូង។

យោងតាមទីភ្នាក់ងារសារព័ត៌មានរដ្ឋ Xinhua លោក Xi បាននិយាយថា ប្រទេសចិនគាំទ្រ G20 ក្នុងការអនុវត្តកិច្ចសហប្រតិបត្តិការជាក់ស្តែងសម្រាប់ជាប្រយោជន៍ដល់ក្រុមប្រទេសកំពុងអភិវឌ្ឍន៍សកលខាងត្បូង ដោយបន្ថែមថាការនាំចូលរបស់ចិនពីប្រទេសកំពុងអភិវឌ្ឍន៍ត្រូវបានគេរំពឹងថានឹងកើនឡើងដល់ទៅ៨ សែនកោដិដុល្លារនៅចន្លោះពេលនេះដល់ឆ្នាំ ២០៣០ ។

លោកថា ចិនមិនស្វែងរកការធ្វើជាតួរអង្គតែម្នាក់ឯងទេ ប៉ុន្តែសង្ឃឹមថា ផ្កា ១០០ នឹងរីក ហើយនឹងសហការគ្នាជាមួយប្រទេសកំពុងអភិវឌ្ឍន៍ជាច្រើន ដើម្បីសម្រេចបាននូវទំនើបកម្ម៕