សហភាពអឺរ៉ុប កាលពីថ្ងៃចន្ទ បានបន្ថែមការដាក់ទណ្ឌកម្មទៅលើប្រទេសអ៊ីរ៉ង់ ជុំវិញការគាំទ្ររបស់ប្រទេសនេះចំពោះសង្គ្រាមរបស់រុស្ស៊ីនៅអ៊ុយក្រែន ដែលរួមមានទាំងការដាក់គោលដៅទៅលើនាវា និងកំពង់ផែដែលត្រូវបានប្រើប្រាស់សម្រាប់ផ្ទេរយានដ្រូន និងមីស៊ីល។

នៅក្នុងចំណាត់ការមួយ ដែលត្រូវបានបដិសេធដោយទីក្រុងតេអេរ៉ង់ ប្លុកអឺរ៉ុបដែលមានប្រទេសចំនួន២៧ បាននិយាយថា ប្លុកនេះហាមឃាត់ការនាំចេញ ផ្ទេរ ផ្គត់ផ្គង់ ឬការលក់ ពីសហភាពអឺរ៉ុប ទៅប្រទេសអ៊ីរ៉ង់នូវសមាសធាតុ ដែលត្រូវបានប្រើសម្រាប់ផលិតមីស៊ីល និងយានដ្រូន(UAVs)។

ប្លុកនេះក៏ហាមឃាត់ប្រតិបត្តិការណាមួយជាមួយកំពង់ផែ ដែលគ្រប់គ្រង ដំណើរការ ឬត្រួតពិនិត្យដោយបុគ្គល និងអង្គភាពដែលត្រូវបានដាក់ទណ្ឌកម្ម ឬប្រើប្រាស់ដើម្បីផ្គត់ផ្គង់ដល់រុស្ស៊ីនូវយានដ្រូន មីស៊ីល បច្ចេកវិទ្យា និងសមាសធាតុដែលពាក់ព័ន្ធ។

សហភាពអឺរ៉ុប បាននិយាយនៅក្នុងសេចក្តីថ្លែងការណ៍ ខណៈរដ្ឋមន្ត្រីការបរទេសរបស់ប្លុកអឺរ៉ុបបានជួបប្រជុំគ្នានៅទីក្រុងប្រ៊ុចសែល ថា «វិធានការនេះ រួមបញ្ចូលទាំងដំណើរការចូលទៅកាន់ទីតាំងកំពង់ផែ និងការផ្តល់សេវាណាមួយដល់នាវា»។

Amirabad និង Anzali គឺជាកំពង់ផែអ៊ីរ៉ង់ចំនួនពីរ នៅសមុទ្រ Caspian។ សហភាពអឺរ៉ុបបាននិយាយបន្ថែមថា ជំនួយនៅតែអាចផ្តល់ដល់នាវាដែលចាំបាច់ ស្ថិតនៅក្រោមកាលៈទេសៈមួយចំនួន ដូចជាសម្រាប់ហេតុផលសុវត្ថិភាពដែនសមុទ្រជាដើម។