នគរបាល និងអភិបាលក្រុងនិយាយថា បុរសវ័យ ៥១ឆ្នាំម្នាក់ បានធ្វើការវាយប្រហារដោយកាំបិតក្នុងទីក្រុងញូវយ៉ក (New York) សហរដ្ឋអាមេរិក កាលពីថ្ងៃចន្ទ (១៨ វិច្ឆិកា) ដោយសម្លាប់មនុស្ស ២នាក់ និងម្នាក់ទៀតរងរបួសធ្ងន់។

នគរបាលបានបង្ហាញរូបភាពនៃអាវុធដែលគេសង្ស័យថាជាកាំបិតផ្ទះបាយយ៉ាងធំប្រឡាក់ដោយឈាម ប៉ុន្តែរហូតមកដល់ពេលនេះមិនបានប្រាប់ហេតុផលក្រោយការវាយប្រហារដល់ទៅបីលើកនេះទេ។

អភិបាលក្រុងញូវយ៉ក លោក Eric Adams បានប្រាប់សន្និសីទសារព័ត៌មានថា "មនុស្សពីរនាក់បានបាត់បង់ជីវិត មនុស្សម្នាក់កំពុងព្យាបាលរបួស ដោយបុរសម្នាក់ត្រូវឃុំខ្លួន ហើយមិនមានជនសង្ស័យបន្ថែមទៀតទេ»។

នគរបាលលើកឡើងថា ជនសង្ស័យរូបនោះ ដំបូងបានចាក់សម្លាប់បុរសវ័យ ៣៦ឆ្នាំម្នាក់ប្រហែលម៉ោង ៨:២២ព្រឹក ក្នុងតំបន់លំនៅឋាន ឈែលស៊ី (Chelsea) នៃតំបន់ មែនហាតថាន (Manhattan) ភាគខាងលិច New York។ បន្ទាប់មក ជនដៃដល់បានឆ្លងកាត់ទីក្រុង ទៅចាក់សម្លាប់បុរសវ័យ ៦៨ឆ្នាំម្នាក់ទៀតដែលកំពុងនេសាទត្រីនៅទន្លេមួយភាគខាងកើតក្នុងពេល ២ម៉ោងក្រោយ។ បន្ទាប់មកទៀត នៅម៉ោង១០:៥៥នាទីព្រឹក ជនសង្ស័យបានបន្តចាក់ស្ត្រីវ័យ ៣៦ឆ្នាំម្នាក់ឱ្យរបួស នៅជិតទីស្នាក់ការកណ្តាលអង្គការសហប្រជាជាតិនៅ Manhattan។

ក្រុមអ្នកស៊ើបអង្កេតនិយាយថា ជនសង្ស័យនោះធ្លាប់មានការចាប់ខ្លួន ៨លើកពីមុន ហើយការចាប់ខ្លួនចុងក្រោយនេះធ្វើឡើងនៅជិតអង្គការសហប្រជាជាតិ ជាមួយនឹងកាំបិតផ្ទះបាយចំនួនពីរដើម៕