ប្រមុខការទូតសហភាពអឺរ៉ុប លោក Josep Borrell បានប្រាប់អ្នកសារព័ត៌មាន កាលពីថ្ងៃចន្ទ បន្ទាប់ពីកិច្ចប្រជុំសហភាពអឺរ៉ុបនៅទីក្រុងព្រុចសែល ប្រទេសបែលហ្ស៊ិកថា សហភាពអឺរ៉ុប មានការព្រួយបារម្ភចំពោះរបាយការណ៍របស់ប្រទេសអ៊ីរ៉ង់ កូរ៉េខាងជើង និងប្រទេសចិន ដែលផលិតនិងផ្គត់ផ្គង់ប្រព័ន្ធសព្វាវុធពេញលេញដល់រុស្ស៊ី សម្រាប់សង្គ្រាមរបស់ប្រទេសនេះនៅអ៊ុយក្រែន។

លោក Borrell បាននិយាយថា «បើគ្មានអ៊ីរ៉ង់ គ្មានចិន នោះរុស្ស៊ី ពុំអាចគាំទ្រដល់កិច្ចប្រឹងប្រែងផ្នែកយោធារបស់ខ្លួនបានឡើយ។

អ្នកការទូតជាន់ខ្ពស់របស់សហភាពអឺរ៉ុប ក៏បានចាត់ទុកសង្គ្រាមដែលបានបន្សល់ទុកការបំផ្លិចបំផ្លាញនៅតំបន់ហ្កាហ្សាថា ជា «សង្រ្គាមប្រឆាំងកុមារ»។

ការិយាល័យសិទ្ធិមនុស្សរបស់អង្គការសហប្រជាជាតិ បាននិយាយកាលពីសប្តាហ៍មុនថាជិត៧០% នៃអ្នកស្លាប់ដែលស្ថាប័ននេះបានផ្ទៀងផ្ទាត់នៅក្នុងសង្គ្រាម គឺជាស្ត្រី និងកុមារ ហើយបានថ្កោលទោសនូវអ្វីដែលខ្លួនចាត់ទុកថាការបំពានជាប្រព័ន្ធនៃគោលការណ៍ជាមូលដ្ឋានច្បាប់មនុស្សធម៌អន្តរជាតិ។

អាជ្ញាធរសុខាភិបាលតំបន់ហ្កាហ្សានិយាយថា មនុស្សជាង៤៣.៨០០នាក់ ត្រូវបានបញ្ជាក់ថាត្រូវបានសម្លាប់ ហើយប្រជាជនស្ទើរតែទាំងអស់នៃប្រជាជន២,៣លាននាក់ បានភៀសខ្លួនចេញ ចាប់តាំងពីសង្រ្គាមផ្ទុះឡើង កាលពីថ្ងៃទី៧ ខែតុលា ឆ្នាំ២០២៣។