កសិករ បានចេញធ្វើបាតុកម្មនៅទូទាំងប្រទេសបារាំងកាលពីថ្ងៃចន្ទ ក្នុងការរំពឹងទុកនៃកិច្ចព្រមព្រៀងពាណិជ្ជកម្មរវាងសហភាពអឺរ៉ុប និងប្លុកទីផ្សាររួមអាមេរិកឡាទីន ដែលនឹងធ្វើឱ្យមានការប្រកួតប្រជែងកាន់តែខ្លាំងសម្រាប់វិស័យកសិកម្មរបស់ប្រទេសបារាំង។

សហភាពអឺរ៉ុប និងសមាជិកប្លុកទីផ្សាររួមអាមេរិកឡាទីន ចំនួនបួនមាន ប្រទេសអាហ្សង់ទីន ប្រេស៊ីល ប៉ារ៉ាហ្គាយ និងអ៊ុយរូហ្គាយ កំពុងជំរុញឱ្យបញ្ចប់ការចរចាពាណិជ្ជកម្មជាយូរមកហើយ នៅចុងឆ្នាំនេះ។

ការតវ៉ា កាលពីថ្ងៃចន្ទគឺជាការតវ៉ាធំបំផុត ចាប់តាំងពីកសិករបារាំង បានធ្វើបាតុកម្មទ្រង់ទ្រាយធំជាច្រើនសប្តាហ៍កាលពីរដូវរងារឆ្នាំមុន ជុំវិញការនាំចូលមានតម្លៃថោកជាង បទប្បញ្ញត្តិមានបន្ទុកច្រើន និងប្រាក់ចំណូលតិច។

កសិករនៅភាគខាងលិចទីក្រុង Angouleme បានយកស្លាកសញ្ញាផ្លូវ ហើយបានដាក់តម្រៀបវានៅលើផ្លូវហាយវ៉េ និងបានបង្កើតពាក្យស្លោកមួយថា «ទេ ចំពោះប្លុកទីផ្សាររួមអាមេរិកឡាទីន និងពាក្យថាបញ្ឈប់វិធានការ» ។

កសិករ ព្រួយបារម្ភថា កិច្ចព្រមព្រៀងជាមួយប្លុកទីផ្សាររួមអាមេរិកឡាទីន នឹងនាំយកសាច់គោ សាច់មាន់ ស្ករ និងពោតកាន់តែច្រើនពីប្រទេសប្រេស៊ីល និងប្រទេសអាហ្សង់ទីន ជាប្រទេសដែលពួកគេនិយាយថាប្រើប្រាស់ថ្នាំសម្លាប់សត្វល្អិតលើដំណាំ និងថ្នាំសម្លាប់មេរោគលើសត្វចិញ្ចឹម ដែលខុសច្បាប់នៅអឺរ៉ុប។

នៅឆ្នាំនេះ កសិករបារាំង ត្រូវប្រឈមមុខនឹងការប្រមូលផលទទួលរងដោយទឹកភ្លៀង ការផ្ទុះឡើងជំងឺលើសត្វចិញ្ចឹម។

ប្រធានសមាគមកសិកម្មដ៏ធំបំផុត FNSEA បាននិយាយថា កសិដ្ឋានរាប់ម៉ឺនកន្លែងនៅក្នុងប្រទេសបារាំង ជាកសិដ្ឋានផលិតកសិកម្មធំបំផុតរបស់សហភាពអឺរ៉ុប បានជួបបញ្ហាហិរញ្ញវត្ថុ។ សមាគមFNSEA និយាយថា បាតុកម្មនេះ មានផែនការធ្វើរហូតដល់ខែធ្នូ។

ប្រធានាធិបតីបារាំង លោក Emmanuel Macron កាលពីថ្ងៃអាទិត្យ បានបញ្ជាក់ជាថ្មីនូវការប្រឆាំងរបស់លោក ចំពោះកិច្ចព្រមព្រៀងជាមួយប្លុកទីផ្សាររួមអាមេរិកឡាទីន ខណៈត្រូវបានស្នើឡើង។