ប្រព័ន្ធផ្សព្វផ្សាយរដ្ឋបាននិយាយថា អ្នកបើកបររថយន្ត SUV មួយគ្រឿងបានបើកបុកសិស្សសាលា និងអ្នកថ្មើរជើងនៅខាងក្រៅសាលាបឋមសិក្សាមួយក្នុងខេត្តហ៊ូណាន (Hunan) ប្រទេសចិន នៅព្រឹកថ្ងៃអង្គារ (១៩ វិច្ឆិកា) នេះ ហើយមនុស្សជាច្រើននាក់បានរងរបួស ខណៈក្ដីបារម្ភបានរីករាលដាលជុំវិញការវាយប្រហារដ៏ហិង្សាក្នុងប្រទេសកាលមួយសប្តាហ៍កន្លងទៅ។

ទូរទស្សន៍ CCTV និងប្រព័ន្ធផ្សព្វផ្សាយរដ្ឋផ្សេងទៀតបានរាយការណ៍ថា រថយន្តនោះបានបុកមនុស្សនៅខាងក្រៅសាលាបឋមសិក្សា យ៉ុនកាន (Yongan) ក្នុងទីក្រុង ឆាងទឺ (Changde) ខណៈសិស្សកំពុងចូលរៀន ដោយបង្ករបួសដល់មនុស្សជាច្រើន។

របាយការណ៍លម្អិតបន្ថែមទៀតនៃចំនួនអ្នករបួសមិនទាន់មានទេ ហើយភ្លាមៗនោះគេក៏មិនទាន់ដឹងច្បាស់ដែរថា តើអ្វីបណ្តាលឱ្យឧបទ្ទវហេតុនោះកើតឡើង ឬថាតើវាជាចេតនា ឬអត់។

ហេតុការណ៍នេះបានកើតឡើងប៉ុន្មានថ្ងៃបន្ទាប់ពីបុរសម្នាក់បានបើករថយន្តរបស់ខ្លួនបំបុកហ្វូងមនុស្សនៅឯមជ្ឈមណ្ឌលកីឡាមួយក្នុងទីក្រុង ជូហៃ (Zhuhai) ភាគខាងត្បូងប្រទេសចិន សម្លាប់មនុស្ស ៣៥នាក់ និងរងរបួសធ្ងន់ ៤៣នាក់ នៅក្នុងការវាយប្រហារជាសាធារណៈដ៏អាក្រក់បំផុតនៅក្នុងការចងចាំនាពេលថ្មីៗនេះ៕