អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរេស (Antonio Guterres) កាលពីថ្ងៃ ចន្ទ បានអំពាវនាវឲ្យមានការឈប់បាញ់ជាបន្ទាន់ និងការបង្កើតតំបន់គ្មានអាវុធនុយក្លេអ៊ែរ នៅមជ្ឈិមបូព៌ា។

នៅក្នុងសារវីដេអូរបស់លោកទៅកាន់សម័យប្រជុំលើកទី៥ នៃសន្និសិទស្តីពីការបង្កើតតំបន់មជ្ឈិមបូព៌ាគ្មានអាវុធនុយក្លេអ៊ែរ និងអាវុធប្រល័យលោកដទៃទៀត លោក ហ្គុយតឺរេស បាននិយាយថា គំនិតនៃការបង្កើតតំបន់បែបនេះ បានកើតមានឡើង ជាច្រើនទសវត្សរ៍មកហើយ ប៉ុន្តែជាមួយនឹងជម្លោះក្នុងតំបន់ បានផ្ទុះឡើង និងភាពតានតឹងឈានដល់ចំណុចពុះកញ្ជ្រោល គោលដៅនេះ គឺកាន់តែត្រូវការជាចាំបាច់ ពីមួយថ្ងៃទៅមួយថ្ងៃ។

លោក បានកត់សម្គាល់ឃើញថា អស់រយៈពេលជាងមួយឆ្នាំមកហើយ តំបន់ហ្កាហ្សា បានជួបនឹងសុបិនអាក្រក់មិនឈប់ឈរ ដែលគំរាមកំហែងដល់តំបន់ទាំងមូល ហើយយើងទាំងអស់គ្នា មានការព្រួយបារម្ភ ចំពោះការកើនឡើងភាពតានតឹង នៅក្នុងប្រទេសលីបង់។

ប្រមុខអង្គការសហប្រជាជាតិនេះ បានអំពាវនាវឲ្យសហគមន៍អន្តរជាតិរួបរួមគ្នាធ្វើយ៉ាងណាឲ្យមានបទឈប់បាញ់ជាបន្ទាន់ ហើយការដោះលែងចំណាប់ថ្នូរទាំងអស់ជាបន្ទាន់ និងដោយគ្មានលក្ខខណ្ឌ និងការចាប់ផ្តើមនៃដំណើរការដែលមិនអាចផ្លាស់ប្តូរបាន ឆ្ពោះទៅរកដំណោះស្រាយរដ្ឋពីរ។

លោកបាននិយាយថា៖«ក្នុងពេលជាមួយគ្នានេះ សន្តិសុខប្រកបដោយនិរន្តរភាព នៅមជ្ឈិមបូព៌ា និងជុំវិញពិភពលោក ពឹងផ្អែកលើការបន្តឆ្ពោះទៅរកគោលដៅរំសាយអាវុធរបស់យើង»។