ប្រភពសន្តិសុខមួយ បាននិយាយកាលពីថ្ងៃព្រហស្បតិ៍សប្តាហ៍មុនថា ប្រទេសអ៊ីរ៉ាក់ បានធ្វើមាតុភូមិនិវត្តន៍មនុស្សចំនួន ៧០៦នាក់ ពីជំរំ Al-Hol របស់ប្រទេសស៊ីរី ដែលផ្តល់ជម្រកដល់មនុស្សរាប់ម៉ឺននាក់ រួមទាំងសមាជិកគ្រួសារនៃក្រុមសកម្មប្រយុទ្ធដែលត្រូវបានគេសង្ស័យផងដែរ។

ជនជាតិស៊ីរី អ៊ីរ៉ាក់ និងជនបរទេសជាង ៤៣.000នាក់ មកពីប្រទេសយ៉ាងហោចណាស់ចំនួន ៤៥ ត្រូវបានឃុំខ្លួន នៅក្នុងជំរំដ៏កខ្វក់ និងមានមនុស្សច្រើនណែនតាន់តាប់ នៅភាគឦសានដែលគ្រប់គ្រងដោយជនជាតិឃើដ។

ជំរំ Al-Hol បានផ្តល់ជម្រកដល់សាច់ញាតិរបស់ក្រុមសកម្មប្រយុទ្ធដេស(Daesh) ដែលត្រូវគេសង្ស័យថា នៅជាមួយនឹងជនភៀសខ្លួន។

ប្រភពសន្តិសុខដែលបានសុំមិនបញ្ចេញឈ្មោះដោយសារតែពួកគេមិនត្រូវបានអនុញ្ញាតឲឲ្យនិយាយទៅកាន់ប្រព័ន្ធផ្សព្វផ្សាយ បានប្រាប់សារព័ត៌មាន AFPថា៖«មនុស្ស ៧០៦ នាក់ ឬ ១៨១ គ្រួសារ បានវិល   ត្រឡប់មកពីជំរំ Al-Hol ទៅប្រទេសអ៊ីរ៉ាក់វិញ ហើយត្រូវបានផ្ទេរទៅជំរំ Al-Jadaa ដែលជាជំរំនៅក្បែរទីក្រុង Mosul ភាគខាងជើង។

ក្រុមឃ្លាំមើលសង្រ្គាមសិទ្ធិមនុស្សស៊ីរីដែលមានមូលដ្ឋាននៅចក្រភពអង់គ្លេស បាននិយាយថា នេះគឺជាក្រុមទី៤នៃជនជាតិអ៊ីរ៉ាក់ ដែលត្រូវបាននាំយកត្រឡប់មកពីជំរំ Al-Hol ក្នុងរយៈពេលមួយឆ្នាំ។