ភ្នំពេញ៖ មជ្ឈមណ្ឌលជាតិហ្វឹកហ្វឺនកីឡានៃក្រសួងអប់រំ យុវជន និងកីឡា បានទទួលការឧបត្ថម្ភម៉ាស់ពីវិស័យឯកជនចំនួន ៥ម៉ឺនម៉ាស់សម្រាប់ចែកជូនក្រុមជម្រើសជាតិកម្ពុជាប្រើប្រាស់ ពិសេសអំឡុងពេលបិទខ្ទប់ប្រមូលផ្ដុំហ្វឹកហាត់ ខណៈពិធីប្រគល់-ទទួលម៉ាស់នេះ បានធ្វើឡើងនៅពហុកីឡដ្ឋានជាតិមរតកតេជោ កាលពីថ្ងៃទី២០ ខែតុលា ឆ្នាំ២០២១។
លោក ប៊ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡាបានឲ្យដឹងថា ជំនួយសម្ភារៈសម្បុរសធម៌នេះឧបត្ថម្ភដោយក្រុមហ៊ុន PPSEC ដែលក្នុងចំណោម ៥ម៉ឺនម៉ាស់នោះមានម៉ាស់ប្រភេទ N-95 ភ្ជាប់ជាមួយការអ៊ុតស្លាកសញ្ជាទង់ជាតិកម្ពុជា និងមានគុនភាពស្ដង់ដារ ISO ចំនួន ១៥,០០០ម៉ាស់ និងម៉ាស់ធម្មតាដែលមានគុណភាពល្អទទួលស្គាល់ដោយក្រសួងសុខាភិបាលចំនួន ៣៥,០០០ម៉ាស់។ លោកបន្ដថា នេះគឺជាតម្រូវការចាំបាច់សម្រាប់មជ្ឈមណ្ឌលជាតិហ្វឺកហ្វឺនកីឡា ក្នុងការចែកជូនដល់កីឡាករកីឡាការិនី គ្រូបង្វឹក មន្ត្រីនៃក្រុមជម្រើសជាតិកម្ពុជាដែលកំពុងហ្វឹកហាត់បិទខ្ទប់នៅពហុកីឡដ្ឋានជាតិមរតកតេជោ ក៏ដូចជាការហ្វឹកហាត់នៅខាងក្រៅដើម្បីចូលរួមទប់ស្កាត់ការរីករាលដាលជំងឺកូវីដ-១៩ ជាមួយរាជរដ្ឋាភិបាលកម្ពុជា ក៏ដូចជាជំរុញការហ្វឹកហាត់ឲ្យកាន់តែមានភាពកក់ក្ដៅបន្ថែមទៀត។
ប្រធានមជ្ឈមណ្ឌលដដែលបន្ថែមថា ក្រោមការអនុវត្តតាមស្ដង់ដារ SOP បច្ចុប្បន្នមានក្រុមជម្រើសជាតិចំនួន ១៩ប្រភេទកីឡាត្រូវប្រមូលផ្ដុំហ្វឹកហាត់នៅពហុកីឡដ្ឋានជាតិមរតកតេជោរហូតដល់ដំណាច់ឆ្នាំ២០២១ ដើម្បីពង្រឹងសមត្ថភាពត្រៀមការប្រកួតអន្ដរជាតិនានា ដូចជាស៊ីហ្គេមលើកទី៣១ នៅវៀតណាមនាឆ្នាំ២០២២ ពិសេសការសម្រួចសមត្ថភាពត្រៀមឆ្ពោះទៅស៊ីហ្គេមឆ្នាំ២០២៣ នៅកម្ពុជាតែម្ដង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
