រដ្ឋបាលលោក Joe Biden កាលពីថ្ងៃចន្ទ (ទី១៨ ខែវិច្ឆិកា) បានប្រកាសដាក់ទណ្ឌកម្មប្រឆាំងនឹងអ្វីដែលខ្លួនបានពិពណ៌នាថា ជាពលរដ្ឋអ៊ីស្រាអែល និងអង្គភាពពាក់ព័ន្ធ ក្នុងចលនាតាំងលំនៅជ្រុលនិយម នៅតំបន់ West Bank ដែលជាផ្នែកនៃកិច្ចខិតខំប្រឹងប្រែងរបស់សហរដ្ឋអាមេរិក ដើម្បីទប់ស្កាត់ការកើនឡើងនូវអំពើហិង្សាលើប្រជាជនប៉ាឡេស្ទីន នៅក្នុងដែនដីនេះ។

ទណ្ឌកម្មនេះ គឺជាផ្នែកមួយនៃក្រឹត្យដែលលោកប្រធានាធិបតី Biden បានចេញ ក្នុងខែកុម្ភៈ ដើម្បីចាត់វិធានការឲ្យមានការទទួលខុសត្រូវ ចំពោះអំពើហិង្សាដែលត្រូវបានធ្វើឡើងដោយអ្នកតាំងលំនៅអ៊ីស្រាអែលជ្រុលនិយម នៅតំបន់ West Bank ដែលសំដៅលើជនប៉ាឡេស្ទីន ហើយនិងអង្គការដែលគាំទ្រអំពើហិង្សាបែបនេះ។

អ្នកនាំពាក្យក្រសួងការបរទេស លោក Matthew Miller បានឲ្យដឹងនៅក្នុងសេចក្តីថ្លែងការណ៍ថា៖ «យើងជាថ្មីម្តងទៀត សូមអំពាវនាវឲ្យរដ្ឋាភិបាលអ៊ីស្រាអែលចាត់វិធានការ និងឲ្យមានការទទួលខុសត្រូវចំពោះ ឬការប្រព្រឹត្ត អំពើហិង្សា ការផ្លាស់ទីលំនៅដោយបង្ខំ និងការរឹបអូសយកដីឯកជន។ សហរដ្ឋអាមេរិក នឹងបន្តជំរុញឲ្យមានការទទួលខុសត្រូវ ចំពោះអ្នកដែលបង្កអស្ថិរភាពបន្ថែមទៀត នៅតំបន់ West Bank និងចំពោះអ្នកគាំទ្រអំពើហិង្សាជ្រុលនិយម នៅក្នុងតំបន់»។

ខណៈពេលដែលប្រធានាធិបតីជាប់ឆ្នោត លោក Donald Trump ដែលបានគាំទ្រលើការតាំងលំនៅរបស់ជនជាតិអ៊ីស្រាអែល កាលពីមុន នឹងមានអំណាចក្នុងការលុបចោលក្រឹត្យរបស់ Biden គេនៅមិនទាន់ច្បាស់ទេថា តើការដាក់ទណ្ឌកម្មលើបុគ្គល និងអង្គភាពនានា អាចត្រូវបានលុបចោលយ៉ាងស្រួលៗដែរ ឬយ៉ាងណា៕