ប្រមុខការទូតរបស់ទីក្រុងសេអ៊ូល កាលពីថ្ងៃចន្ទ (ទី១៨ ខែវិច្ឆិកា) បាននិយាយថា រាល់ការប៉ុនប៉ងណាមួយ ដើម្បីបញ្ចប់ការគាំទ្រផ្នែកយោធារបស់កូរ៉េខាងជើង សម្រាប់សង្រ្គាមរបស់រុស្ស៊ី នៅអ៊ុយក្រែន គឺចាំបាច់ត្រូវដំណើរការស្របគ្នាជាមួយនឹងការជំរុញ ដើម្បីរំសាយអាវុធនុយក្លេអ៊ែររបស់កូរ៉េខាងជើង ដោយសង្កត់ធ្ងន់ថា ការគាំទ្ររបស់ក្រុងព្យុងយ៉ាង សម្រាប់ទីក្រុងមូស្គូ កំពុងធ្វើឲ្យបញ្ហាសន្តិសុខប្រែប្រួលយ៉ាងខ្លាំង នៅតំបន់ឥណ្ឌូ-ប៉ាស៊ីហ្វិក និងអឺរ៉ុប។

នៅក្នុងសារទៅកាន់វេទិកាប្រចាំឆ្នាំមួយ លោក Cho បានសម្តែងសុទិដ្ឋិនិយមថា សម្ព័ន្ធភាពកូរ៉េខាងត្បូង-អាមេរិក នឹងបន្ត «រីកចម្រើន» ក្រោមរដ្ឋបាលនាពេលខាងមុខរបស់លោក Trump ទោះបីជាមានការព្រួយបារម្ភថា គោលការណ៍ «អាមេរិកទី១» (America First) របស់ប្រធានាធិបតីជាប់ឆ្នោត លោក Donald Trump អាចធ្វើឲ្យភាពជាដៃគូចុះខ្សោយ ជាមួយបណ្ដាសម្ព័ន្ធមិត្ត និងដៃគូនានាក៏ដោយ។ 

លោក Cho បាននិយាយនៅក្នុងសារវីដេអូសម្រាប់វេទិកាយុទ្ធសាស្ត្រកូរ៉េខាងត្បូង-អាមេរិក ដែលរៀបចំរួមគ្នាដោយមជ្ឈមណ្ឌលសិក្សាយុទ្ធសាស្ត្រអន្តរជាតិ និងមូលនិធិកូរ៉េថា៖ «កងទ័ព និងសព្វាវុធរបស់កូរ៉េខាងជើង ដែលបានដាក់ពង្រាយទៅកាន់រុស្ស៊ី កំពុងគំរាមកំហែងដោយផ្ទាល់ដល់អឺរ៉ុប និងធ្វើឲ្យបញ្ហាសន្តិសុខប្រែប្រួលយ៉ាងខ្លាំង នៅតំបន់ឥណ្ឌូ-ប៉ាស៊ីហ្វិក និងអឺរ៉ុប។ 

លោកបានបន្ថែមថា៖ «ដូច្នេះហើយ រាល់ការប៉ុនប៉ងដើម្បីបញ្ចប់សង្រ្គាម នៅអ៊ុយក្រែន នឹងមិនគ្រប់គ្រាន់ទេ ដោយមិនបានដោះស្រាយជំនួយខុសច្បាប់របស់កូរ៉េខាងជើង ចំពោះកិច្ចប្រឹងប្រែងធ្វើសង្គ្រាមរបស់រុស្ស៊ី ហើយការប៉ុនប៉ងណាមួយ ដើម្បីបញ្ឈប់ការគាំទ្រផ្នែកយោធារបស់កូរ៉េខាងជើង ចំពោះការលុកលុយរបស់រុស្ស៊ី នឹងមិនអាចចប់សព្វគ្រប់នោះទេ ប្រសិនបើគ្មានការជំរុញស្របគ្នា ដើម្បីរំសាយអាវុធនុយក្លេអ៊ែររបស់កូរ៉េខាងជើងនោះ»។ 

គួរបញ្ជាក់ថា សម្ព័ន្ធភាពយោធាកាន់តែស៊ីជម្រៅ រវាងទីក្រុងមូស្គូ និងព្យុងយ៉ាង គឺជាប្រភពនៃក្តីបារម្ភកាន់តែខ្លាំងឡើង សម្រាប់ទាំងទីក្រុងសេអ៊ូល និងទីក្រុងវ៉ាស៊ីនតោន ខណៈដែលការគាំទ្រទាំងផ្នែកគ្រឿងយុទ្ធោបករណ៍ និងបុគ្គលិករបស់កូរ៉េខាងជើងដល់រុស្ស៊ី អាចពង្រីកសង្រ្គាម នៅអ៊ុយក្រែន ហើយកិច្ចសហប្រតិបត្តិការរបស់ប្រទេសទាំង២ អាចប៉ះពាល់ដល់សន្តិសុខ នៅលើឧបទ្វីបកូរ៉េ៕