សេចក្តីប្រកាសលទ្ធផលនៃកិច្ចប្រជុំកំពូល G20 នៅទីក្រុង Rio de Janeiro បានលើកឡើងថា មេដឹកនាំ G20 បង្ហាញពីការព្រួយបារម្ភរបស់ពួកគេចំពោះស្ថានភាពមនុស្សធម៌ដ៏មហន្តរាយ នៅតំបន់ហ្កាហ្សាស្ទ្រីប និងការកើនឡើងភាពតានតឹង នៅក្នុងប្រទេសលីបង់។

សេចក្តីប្រកាសនោះ បានបន្តថា៖«ខណៈពេលដែលបង្ហាញពីការព្រួយបារម្ភយ៉ាងខ្លាំងរបស់យើងអំពីស្ថានភាពមនុស្សធម៌ដ៏មហន្តរាយ នៅតំបន់ហ្កាហ្សា និងការកើនឡើងភាពតានតឹង នៅក្នុងប្រទេសលីបង់ យើងសង្កត់ធ្ងន់លើតម្រូវការបន្ទាន់ ដើម្បីពង្រីកលំហូរនៃជំនួយមនុស្សធម៌ និងដើម្បីពង្រឹងការការពារជនស៊ីវិល និងទាមទារឲ្យមានការដករបាំងទាំងអស់ចំពោះការផ្តល់នូវជំនួយមនុស្សធម៌ក្នុងចំនួនច្រើន»។  

សេចក្តីប្រកាសបានបន្ថែមថា៖«ដោយបញ្ជាក់ពីសិទ្ធិរបស់ប៉ាឡេស្ទីនក្នុងការសម្រេចចិត្តដោយខ្លួនឯង យើងសូមបញ្ជាក់ឡើងវិញនូវការប្តេជ្ញាចិត្តឥតងាករេរបស់យើងចំពោះទស្សនវិស័យនៃដំណោះស្រាយរដ្ឋពីរ ដែលអ៊ីស្រាអែល និងរដ្ឋប៉ាឡេស្ទីនរស់នៅជាមួយគ្នាដោយសន្តិភាព ក្នុងព្រំដែនដែលមានសុវត្ថិភាព និងទទួលស្គាល់ ស្របតាមច្បាប់អន្តរជាតិ និងសេចក្តីសម្រេចពាក់ព័ន្ធរបស់អង្គការសហប្រជាជាតិ។ 

មេដឹកនាំក្រុមប្រទេស G20 ក៏បានប្រកាសពីការគាំទ្ររបស់ពួកគេចំពោះបទឈប់បាញ់ដ៏ទូលំទូលាយ នៅតំបន់ហ្កាហ្សា ស្របតាមសេចក្តីសម្រេចលេខ ២៧៣៥ របស់ក្រុមប្រឹក្សាសន្តិសុខអង្គការសហប្រជាជាតិ និង នៅក្នុងប្រទេសលីបង់។