កាលពីថ្ងៃចន្ទម្សិលមិញ ប្រធានាធិបតីសហរដ្ឋអាមេរិកលោក Joe Biden បានសន្យាផ្តល់វិភាគទាន ៤ពាន់លានដុល្លារដល់មូលនិធិសមាគមអភិវឌ្ឍន៍អន្តរជាតិ(IDA)របស់ធនាគារពិភពលោកសម្រាប់ប្រទេសក្រីក្របំផុតនៅលើពិភពលោក ។

លោក Bidenបានប្រកាសកញ្ចប់ជំនួយសហរដ្ឋអាមេរិកអំឡុងសុន្ទរកថាចុងក្រោយរបស់លោកទៅកាន់កិច្ចប្រជុំកំពូលប្រទេសមានឧស្សាហកម្មរីកលូតលាស់ G20 នៅទីក្រុង Rio de Janeiro ប្រទេសប្រេស៊ីល គឺជាបរិមាណជំនួយជាប់កំណត់ត្រា និងច្រើនជាងជំនួយ ៣,៥ពាន់លានដុល្លារដែលទីក្រុងវ៉ាស៊ីងតោន បានប្តេជ្ញាផ្តល់ជូនលើកមុនដល់ IDAកាលពីឆ្នាំ ២០២១ ។

លោក Bidenនិយាយថា សហរដ្ឋអាមេរិកគាំទ្រអធិបតេយ្យភាព និងបូរណភាពទឹកដីរបស់អ៊ុយក្រែន ។ អ្នករាល់គ្នានៅជុំវិញតុកមួយនេះ តាមគំនិតរបស់លោក គួរតែធ្វើដូចគ្នា ហើយម្យ៉ាងវិញទៀត ការវាយលុករបស់រុស្ស៊ីលើអ៊ុយក្រែន នាំឲ្យតម្លៃស្បៀងអាហារហក់ឡើងខ្ពស់បំផុតជាប់កំណត់ត្រានៅក្នុងប្រវត្តិសាស្រ្ត ។

លោកបន្តថា ដូចដែលលោកធ្លាប់បាននិយាយកាលពីមុនអញ្ចឹង នៅតំបន់ហ្កាហ្សា អ៊ីស្រាអែលមានសិទ្ធិការពារខ្លួន ក្រោយការសម្លាប់រង្គាលដ៏អាក្រក់បំផុតលើជនជាតិជ្វីហ្វ ប៉ុន្តែវិធីដែលពួកគេការពារខ្លួន បើទោះបីជាក្រុមហាម៉ាស់លាក់ខ្លួននៅក្នុងចំណោមជនស៊ីវិល បញ្ហាគឺមានច្រើនខ្លាំងណាស់ ។ សហរដ្ឋអាមេរិក បានដឹកនាំពិភពលោកក្នុងការនាំជំនួយចូលទៅកាន់តំបន់ហ្កាហ្សា ហើយពួកយើងនឹងបន្តជំរុញឲ្យពន្លឿនកិច្ចព្រមព្រៀងបទឈប់បាញ់ ដែលធានាដល់សន្តិសុខអ៊ីស្រាអែល នាំចំណាប់ថ្នូរត្រឡប់មកផ្ទះវិញ និងការបញ្ចប់ការឈឺចាប់របស់ជនប៉ាឡេស្ទីន និងកុមារ ។

លោក Bidenបានបញ្ជាក់ទៀតថា លោកសូមស្នើសុំឲ្យអ្នករាល់គ្នានៅទីនេះ បង្កើនសំពាធលើក្រុមហាម៉ាស់ ដែលបច្ចុប្បន្នបដិសេធន៍កិច្ចព្រមព្រៀងមួយនេះ ៕