ទីភ្នាក់ងារសារព័ត៌មានរុស្ស៊ី នៅថ្ងៃអង្គារ (ទី១៩ ខែវិច្ឆិកា) បានរាយការណ៍ដោយដកស្រង់សម្តីពីក្រសួងការពារជាតិរុស្ស៊ីថា អ៊ុយក្រែនបានបើកការវាយប្រហារមួយលើតំបន់ Bryansk របស់រុស្ស៊ីពេញមួយយប់ដោយប្រើប្រាស់មីស៊ីលរយៈចម្ងាយឆ្ងាយ ATACMS ផលិតដោយសហរដ្ឋអាមេរិកចំនួន ៦គ្រាប់។

សេចក្ដីរាយការណ៍បានឲ្យដឹងថា ប្រព័ន្ធការពារដែនអាកាសរបស់រុស្ស៊ី បានស្ទាក់ចាប់មីស៊ីលនោះចំនួន ៥ គ្រាប់ និងបានធ្វើឲ្យខូចខាតមួយគ្រាប់។ សារព័ត៌មាននេះបានបន្ថែមថា កម្ទេចកម្ទីពីមីស៊ីលមួយគ្រាប់ បានធ្លាក់ទៅលើទីតាំងយោធា ក្នុងតំបន់ ដោយបណ្តាលឲ្យមានអគ្គិភ័យ។ តែក្រសួងបាននិយាយថា ការវាយប្រហារនេះមិនបណ្តាលឲ្យមានមនុស្សរងរបួស ឬខូចខាតអ្វីឡើយ។

មិនមានការបញ្ជាក់ជាផ្លូវការពីអ៊ុយក្រែនអំពីអាវុធប្រភេទអ្វីដែលត្រូវបានប្រើប្រាស់នោះឡើយ។ បុគ្គលិកទូទៅរបស់យោធា និងភ្នាក់ងារស៊ើបការណ៍យោធា មិនបានឆ្លើយតបភ្លាមៗនោះទេ ចំពោះសំណើសុំការអត្ថាធិប្បាយ។

គួរបញ្ជាក់ថា ទីភ្នាក់ងារសារព័ត៌មាន Reuters និងបណ្តាញផ្សព្វផ្សាយផ្សេងទៀត បានរាយការណ៍ កាលពីថ្ងៃអាទិត្យចុងសប្ដាហ៍កន្លងមកថា ទីក្រុងគីវទទួលបានការអនុញ្ញាតពីសេតវិមានឲ្យប្រើប្រាស់អាវុធដែលផ្គត់ផ្គង់ដោយសហរដ្ឋអាមេរិក ដើម្បីវាយប្រហារចូលកាន់តែជ្រៅទៅក្នុងប្រទេសរុស្ស៊ី។ សារព័ត៌មាន Reuters បានដកស្រង់ប្រភពដែលនិយាយថា ទីក្រុងគីវនឹងចាប់ផ្តើមការវាយប្រហារនៅប៉ុន្មានថ្ងៃខាងមុខនេះ ហើយថា ពួកគេទំនងជាអនុវត្តការប្រហារនោះដោយប្រើមីស៊ីល ATACMS។

បណ្ដាញសារព័ត៌មានរបស់អ៊ុយក្រែន Forbes Ukraine និង RBC Ukraine បានផ្សព្វផ្សាយដោយដកស្រង់ប្រភពដែលមិនបញ្ចេញឈ្មោះ ដោយពួកគេបាននិយាយថា មីស៊ីល ATACMS ត្រូវបានប្រើជាលើកដំបូង ដើម្បីវាយប្រហារចូលទីក្រុង Karachev ក្នុងតំបន់ Bryansk ដែលមានចម្ងាយជាង ១១០ គីឡូម៉ែត្រពីអ៊ុយក្រែន៕