អាហ្វហ្គានីស្ថាន៖ ឧបនាយករដ្ឋមន្ត្រីម្នាក់នៅក្នុងរដ្ឋាភិបាលបណ្តោះអាសន្ន របស់តាលីបង់កាលពីថ្ងៃពុធបាននិយាយថា វាគឺជាសិទ្ធិរបស់ប្រជាពលរដ្ឋអាហ្វហ្គានីស្ថានដែលរដ្ឋាភិបាលថ្មីត្រូវតែទទួលស្គាល់។ លោក Abdul Salam Hanafi កំពុងនិយាយនៅក្នុងកិច្ចពិភាក្សាស្តីពីបញ្ហារបស់អាហ្វហ្គានីស្ថានដែលរៀបចំឡើងនៅប្រទេសរុស្ស៊ី ដោយមានការចូលរួមពីតំណាងជាន់ខ្ពស់របស់ក្រុមតាលីបង់ និងប្រទេសជិតខាងដែលជាជំនួបខាងការទូតមួយជុំ ដែលគូសបញ្ជាក់ពីឥទ្ធិពលរបស់ក្រុងមូស្គូនៅអាស៊ីកណ្តាល។
ចំពោះបញ្ហាសិទ្ធិស្ត្រី លោកបានបន្ថែមថា៖ «ស្ត្រីគឺជាបងប្អូនស្រីរបស់យើង ម្តាយរបស់យើង ហើយយើងគោរពពួកគេ។ យើងនឹងបង្កើតស្ថានភាពការងារសម្រាប់ពួកគេនៅក្នុងតំបន់ទាំងនោះ ជាទីដែលពួកគេត្រូវការដោយយោងទៅតាមច្បាប់ឥស្លាម Sharia»។ នៅក្នុងសេចក្តីថ្លែងការណ៍សន្និដ្ឋាន អ្នកចូលរួមក្នុងកិច្ចពិភាក្សាបានកត់សម្គាល់ថា ការចូលរួមជាក់ស្តែងបន្ថែមទៀតជាមួយអាហ្វហ្គានីស្ថាន ចាំបាច់ត្រូវទទួលយកការពិតថ្មីនោះគឺក្រុមតាលីបង់បានគ្រប់គ្រងអំណាចក្នុងប្រទេសនេះ ដោយមិនគិតពីការទទួលស្គាល់ជាផ្លូវការរបស់រដ្ឋាភិបាលអាហ្វហ្គានីស្ថានថ្មី ដោយសហគមន៍អន្តរជាតិ។
សហភាពសូវៀតបានធ្វើសង្គ្រាមរយៈពេល ១០ឆ្នាំនៅអាហ្វហ្គានីស្ថានដែលបានបញ្ចប់ដោយការដកកងទ័ពរបស់ខ្លួនកាលពីឆ្នាំ១៩៨៩។ ក្នុងរយៈពេលប៉ុន្មានឆ្នាំចុងក្រោយនេះ ទីក្រុងមូស្គូបានត្រលប់មកវិញប្រកបដោយឥទ្ធិពល ក្នុងនាមជាអ្នកសម្របសម្រួលដ៏មានឥទ្ធិពលនៅក្នុងកិច្ចពិភាក្សាអន្តរជាតិស្តីពីអាហ្វហ្គានីស្ថាន ដោយធ្វើជាម្ចាស់ផ្ទះតំណាងក្រុមតាលីបង់ និងសមាជិកនៃក្រុមផ្សេងទៀតសម្រាប់កិច្ចប្រជុំទ្វេភាគី និងពហុភាគី៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
