អ៊ុយក្រែន បានប្រើប្រាស់មីស៊ីលតាកទិកកងទ័ព ATACMS រយៈចម្ងាយឆ្ងាយរបស់សហរដ្ឋអាមេរិក ដើម្បីវាយប្រហារលើទឹកដីរុស្ស៊ី កាលពីថ្ងៃអង្គារ (១៩ វិច្ឆិកា) ដោយទាញយកប្រយោជន៍ពីការអនុញ្ញាតថ្មីរបស់រដ្ឋបាលប្រធានាធិបតីអាមេរិក លោក Joe Biden នៅថ្ងៃទី១.០០០ នៃសង្រ្គាម។

រុស្ស៊ី និយាយថា កងកម្លាំងខ្លួនបានបាញ់ទម្លាក់មីស៊ីល ៥ ក្នុងចំណោម ៦គ្រឿង ដែលបាញ់លើមូលដ្ឋានយោធាក្នុងតំបន់ ព្រីយ៉ាន (Bryansk) ខណៈប្ដេជ្ញាសងសឹកលើការវាយប្រហារចូលជ្រៅជាលើកដំបូងនេះ។ សេចក្តីរាយការណ៍​បន្ត​ថា កម្ទេច​កម្ទីមីស៊ីល ​១​គ្រឿង​បាន​ឆាបឆេះមូលដ្ឋាននោះប៉ុន្តែក៏ត្រូវពន្លត់វិញយ៉ាង​លឿន ហើយ​មិន​បណ្តាល​ឱ្យ​មាន​មនុស្ស​រង​របួស ឬ​ខូចខាត​អ្វី​ឡើយ។

អ៊ុយក្រែន និយាយថា ខ្លួនវាយប្រហារឃ្លាំងអាវុធរុស្ស៊ីចម្ងាយប្រហែល ១១០គីឡូម៉ែត្រ នៅខាងក្នុងទឹកដីរុស្ស៊ី ដែលជាការវាយប្រហារបណ្តាលឱ្យមានការផ្ទុះបន្ទាប់បន្សំជាច្រើន។ យោធាអ៊ុយក្រែន មិនបញ្ជាក់ជាសាធារណៈពីប្រភេទអាវុធដែលប្រើប្រាស់ទេ ប៉ុន្តែប្រភពរដ្ឋាភិបាលអ៊ុយក្រែន និងមន្ត្រីអាមេរិកម្នាក់បានបញ្ជាក់ថា ទីក្រុងគីវបានប្រើប្រាស់មីស៊ីលរយៈចម្ងាយឆ្ងាយ ATACMS។

មន្ត្រីអាមេរិកម្នាក់លើកឡើងថា រុស្ស៊ីបានស្ទាក់ចាប់បានមីស៊ីល ២គ្រឿងប៉ុណ្ណោះ ក្នុងចំណោម៨គ្រឿង ហើយការវាយប្រហារនេះគឺលើចំណុចផ្គត់ផ្គង់គ្រាប់រំសេវ។ មីស៊ីល ATACMS ដែលមានចម្ងាយរហូតដល់ ៣០០ គីឡូម៉ែត្រនេះ គឺខ្លីជាងមីស៊ីលមួយចំនួនដែលទីក្រុងមូស្គូធ្លាប់ប្រើវាយប្រហារអ៊ុយក្រែន រួមទាំងសព្វាវុធ គីនហ្សាល (Kinzhal) ល្បឿនលឿនជាងសំឡេងរបស់ខ្លួន ដែលមានរយៈចម្ងាយរាយការណ៍រហូតទៅដល់ ២.០០០គីឡូម៉ែត្រ៕