​បាល់ទាត់៖ ​អ្នកចាត់ការ​ក្រុម​សារិកា​ព្រៃ Newcastle United លោក Steve Bruce បានសំរេច​ចិត្ត​លាលែង​ពី​តំណែង ១៣ថ្ងៃបន្ទាប់ពី​ក្លិប​ទើប​ផ្លាស់ប្តូរ​ម្ចាស់​ថ្មី​។ ​​បុរស​វ័យ ៦០ឆ្នាំ​រូបនេះ​បាន​ដឹកនាំ​ការប្រកួត​ទី ១០០០ ក្នុង​អាជីព​របស់លោក​កាលពី​ថ្ងៃអាទិត្យ​ក្នុង​បរាជ័យ​ក្រោម​ថ្វី​ជើង​ក្រុម​ភ្ញៀវ Tottenham Hotspur ៣-២ ដែលជា​ប្រកួត​ដំបូង​របស់ Newcastle ក្រោម​ការកាន់កាប់​រប​ស់​ម្ចាស់​ក្លិប​ថ្មី​។

​​Newcastle ត្រូវបាន​ម្ចាស់​ក្លិប​ចាស់​លោក Mike Ashley លក់​ភាគហ៊ុន​ធំ​តម្លៃ ៣០៥លាន​ផោន​ទៅឱ្យក្រុមហ៊ុន​អា​រ៉ា​ប៊ី​សា​អ៊ូ​ឌី​ដែល​ស្ថិតក្រោម​ការវិនិយោគរ​បស់​ព្រះអង្គម្ចាស់ Mohamed Bin Salman ដែលមាន​ទ្រព្យសម្បត្តិ​រាប់ពាន់​លាន​ដុល្លារ និង​អាច​និយាយបានថា​ មានទ្រព្យ​សម្បត្តិ​ច្រើនជាង​ម្ចាស់​ក្លិប​បាល់ទាត់​ណាៗ​ទាំងអស់​នៅលើ​លោក​។ ​​លោក Steve Bruce ត្រូវបានតែងតាំង​ឱ្យ​ដឹកនាំ Newcastle កាលពី​ខែកក្កដា ​ឆ្នាំ២០១៩ ដោយ​ ២​រដូវ​កាល​ពេញក្រោម​ការដឹកនាំ​របស់​លោក Newcastle បានបញ្ចប់​នៅ​ចំណាត់ថ្នាក់​លេខ ១៣ និង​លេខ ១២​។ ​​ចំណែក​រដូវ​កាល​នេះ​វិញ Newcastle នៅ​មិនទាន់​ឈ្នះ​ឡើយ និង​ឈរ​លេខ ១៩ ក្នុង​តារាង​មានតែ​ ៣ពិន្ទុ​ប៉ុណ្ណោះ​ពី​ការប្រកួត ៨លើក​ស្មើ៣ ចាញ់៥​។

​​ក្រោម​ការដឹកនាំ​របស់ Steve Bruce ចំនួន ៩៧ប្រកួត Newcastle មាន​ភាគរយ​ឈ្នះ​តែ ២៨.៨% ប៉ុណ្ណោះ​ដែលជា​អត្រា​ទាប​បំផុត​បើ​ប្រៀបធៀប​នឹង​ក្លិប​ផ្សេងៗ​ដែល​លោក​ធ្លាប់​ដឹកនាំ​។ ​​ក្រោម​ការវិនិយោគ​ដែលមាន​លុយ​សន្ធឹកសន្ធាប់ Newcastle ត្រូវបាន​គេ​ដឹងថា ​កំពុង​ស្វែងរក​អ្នកចាត់ការ​ដែលមាន​ឈ្មោះ​ល្បី និង​មាន​បទពិសោធ​ម្នាក់មុននឹង​ចាប់ផ្តើម​ស្វែងរក​កីឡាករ​មក​រួម​ក្លិប​។ ​​Newcastle នឹងត្រូវ​ធ្វើដំណើរ​ទៅ​ទឹកដី Crystal Palace នៅ​ថ្ងៃ​សៅរ៍​នេះ​សប្តាហ៍​ទី៩ ក្របខណ្ឌ English Premier League៕

​អត្ថបទ​៖​នាង សុភា​វុ​ធ