កសិករបារាំង បានធ្វើការតវ៉ាយ៉ាងខឹងសម្បារក្នុងថ្ងៃទីពីរកាលពីថ្ងៃអង្គារ (១៩ វិច្ឆិកា) ជុំវិញកិច្ចចរចាពាណិជ្ជកម្មរវាងសហភាពអឺរ៉ុប ជាមួយនឹងប្លុកទីផ្សាររួមអាមេរិកឡាទីន (EU-Mercosur) ដោយសមាជិកមកពីសហជីពប្រកាន់ជំហរតឹង រូរ៉ាលេ (Rurale) បានរារាំងផ្លូវរថយន្តដឹកទំនិញ បោះចោលស្រាអេស្ប៉ាញ និងបិទអគាររដ្ឋជាច្រើន ដែលជាការគំរាមកំហែងនៃការរំខានដល់ខ្សែច្រង្វាក់ផ្គត់ផ្គង់អាហារ។

ការជំរុញឱ្យបញ្ចប់កិច្ចព្រមព្រៀងពាណិជ្ជកម្មរវាងសហភាពអឺរ៉ុប និងបណ្តាប្រទេសនៅអាមេរិកខាងត្បូងនៅក្នុងទីផ្សាររួម មើកូសួ (Mercosur) បានធ្វើឱ្យមានការមិនសប្បាយចិត្តនៅតាមជនបទ ជុំវិញការប្រកួតប្រជែងមិនយុត្តិធម៌ បទប្បញ្ញត្តិសាំញ៉ាំ និងប្រាក់ចំណូលទាបសម្រាប់កសិដ្ឋាន។

បន្ទាប់ពីសហជីពកសិកម្មដ៏ធំបំផុតរបស់បារាំង FNSEA បានរៀបចំការតវ៉ាជាង ៨០កន្លែង កាលពីថ្ងៃចន្ទ រួមទាំងការប្រមូលផ្តុំគ្នានៅមុខអគាររដ្ឋាភិបាល និងការដុត "ភ្លើងនៃកំហឹង" នៅក្នុងវាលស្រែពេញមួយយប់ ក្រុមសហជីពនេះមានកំហឹងកាន់តែខ្លាំងកាលពីថ្ងៃអង្គារ ដោយថ្កោលទោសអ្វីដែលគេហៅថា "សេចក្ដីស្លាប់របស់កសិកម្ម"។

ក្រុមនេះបានគម្រាមបិទកំពង់ផែ និងមជ្ឈមណ្ឌលចែកចាយរបស់អ្នកលក់រាយ ដើម្បីរំខានការផ្គត់ផ្គង់ស្បៀង ប្រសិនបើអាជ្ញាធរមិនប្រកាសវិធានការជាបន្ទាន់។ ជាមួយគ្នានេះ កសិករអង់គ្លេសក៏បានតវ៉ាកាលពីថ្ងៃអង្គារ ដើម្បីទាមទារឱ្យលុបចោលពន្ធបន្តមរតក ដែលពួកគេនិយាយថានឹងបំផ្លាញកសិដ្ឋានលក្ខណៈគ្រួសារ និងគំរាមកំហែងដល់ការផលិតស្បៀងអាហារ៕