រដ្ឋមន្ត្រីការពារជាតិចិន នឹងមិនជួបជាមួយរដ្ឋមន្ត្រីការពារជាតិអាមេរិកក្នុងសប្តាហ៍នេះទេ ជាលើកទីមួយក្នុងរយៈពេលមួយឆ្នាំដែលទីក្រុងប៉េកាំងបានផ្អាកកិច្ចពិភាក្សាយោធាកម្រិតខ្ពស់។

មន្ត្រីការពារជាតិអាមេរិកជាន់ខ្ពស់មួយរូប ដែលនិយាយជាមួយអ្នកសារព័ត៌មានមុនកិច្ចប្រជុំកំពូលមន្ត្រីការពារជាតិអាស៊ីនៅប្រទេសឡាវនៅថ្ងៃពុធសប្ដាហ៍នេះ បាននិយាយថា មន្ទីរបញ្ចកោណបានស្នើឱ្យមានជំនួប តែចិនបានបដិសេធ ដោយលើកឡើងពីការប្រឆាំងចំពោះការលក់អាវុធរបស់សហរដ្ឋអាមេរិកទៅឱ្យកោះតៃវ៉ាន់។

មន្ត្រីរូបនេះបានលើកឡើងថានេះគឺហេតុផលសំខាន់ ហើយបានលើកឡើងពីហេតុផលផ្សេងទៀតរបស់ប្រទេសចិនក្នុងការបញ្ឈប់ការពិភាក្សានៅក្នុងប៉ុន្មានឆ្នាំថ្មីៗនេះ ដោយសារទណ្ឌកម្ម វិបត្តិបាឡុងចារកម្ម និងដំណើរទស្សនកិច្ចរបស់អតីតប្រធានសភាលោកស្រី Nancy Pelosi ទៅកាន់កោះតៃវ៉ាន់ក្នុងឆ្នាំ ២០២២។

សម្រាប់តែនៅក្នុងឆ្នាំនេះ អាមេរិកបានបញ្ជូនឲ្យក្រុងតៃប៉ិ ចំនួន ១,២ពាន់លានដុល្លារជាជំនួយសន្តិសុខរយៈពេលវែង និង ៥៦៧ លានដុល្លារផ្សេងទៀតក្នុងឧបករណ៍ដែលដឹកជញ្ជូនដោយផ្ទាល់ពីឃ្លាំងស្តុកអាវុធរបស់សហរដ្ឋអាមេរិក ។

ការលក់គ្រឿងយុទ្ធោបករណ៍បរទេសថ្មីៗបំផុតទៅឲ្យកោះតៃវ៉ាន់បានធ្វើឡើងកាលពីចុងខែតុលា ហើយរួមបញ្ចូលទាំងប្រព័ន្ធរ៉ាដា មានតម្លៃរហូតដល់ ៨២៨ លានដុល្លារ។

មេដឹកនាំចិនលោក Xi Jinping បានជួបជាមួយប្រធានាធិបតីអាមេរិក Joe Biden កាលពីចុងសប្តាហ៍មុនក្នុងប្រទេសប៉េរូ ហើយមេដឹកនាំទាំង២បានពិភាក្សាអំពីបញ្ហាសន្តិសុខ រួមទាំងកោះតៃវ៉ាន់ផងដែរ៕