នគរបាល បាននិយាយថា សមាជិកក្រុមជនអន្ធពាលជាង២០នាក់ ត្រូវបានសម្លាប់នៅក្នុងរដ្ឋធានីរបស់ប្រទេសហៃទី កាលពីថ្ងៃអង្គារ ទី១៩ វិច្ឆិកា បន្ទាប់ពីអ្នកស្រុកបានចូលរួមជាមួយនគរបាល ដើម្បីប្រយុទ្ធប្រឆាំងការប៉ុនប៉ងវាយប្រហារកាលពីពេលយប់ នៅតំបន់ភ្នំដែលសម្បូរធនធាននៅជាយទីក្រុងព័រ អូប្រាំង។

ក្រុង Petion-Ville ត្រូវបានបិទ កាលពីថ្ងៃអង្គារ ខណៈអ្នកស្រុកបានរាំងផ្លូវ និងបានសុំឲ្យអ្នកទាំងឡាយ កុំចេញពីតំបន់ ហើយស្នាក់នៅក្នុងលំនៅឋាន ខណៈមនុស្សមួយចំនួនធ្វើដំណើរចល័ត ខ្លះមានកាន់កាំបិត និងញញួរនៅក្នុងដៃ ដើម្បីការពារស្រុកភូមិពីការលុកលុយរបស់ក្រុមជនអន្ធពាល។ អ្នកសារព័ត៌មាន Reuters ម្នាក់ បានឃើញសាកសពយ៉ាងហោចណាស់២៥នាក់ នៅទូទាំងសង្កាត់ចំនួន៣ ។

អ្នកនាំពាក្យរងនគរបាលជាតិ លោក Lionel Lazarre បានប្រាប់សារព័ត៌មានរ៉យទ័រថា មនុស្សប្រហែល៣០នាក់ ដែលលោកបានចាត់ទុកថាជាសមាជិកក្រុមជនអន្ធពាល បានរងរបួសធ្ងន់។

ទោះជាយ៉ាងណា សកម្មជនសិទ្ធិមនុស្ស បានព្រមានអំពីប្រជាជនស្លូតត្រង់ ដែលជាប់ពាក់ព័ន្ធក្នុងការសម្លាប់ ហើយអង្គការសហប្រជាជាតិ បានរាយការណ៍ពីករណីអំពើហិង្សា ដែលបានប្រព្រឹត្តលើអ្នកដែលត្រូវបានចោទប្រកាន់ពីបទឧក្រិដ្ឋកម្ម។