នៅផ្ទះបាយដាំស្លមួយកន្លែងនៅទីក្រុង Khan Younis កាលពីថ្ងៃអង្គារ ពលរដ្ឋប៉ាឡេស្ទីន បានកាន់ឆ្នាំងទទេដោយសង្ឃឹមថានឹងទទួលបានអហារដើម្បីទទួលទាន។ មានកង្វះស្បៀងអាហារ និងគ្រឿងផ្គត់ផ្គង់ នៅតំបន់ហ្កាហ្សា ហើយក៏មានការកើនឡើងយ៉ាងខ្លាំងនៃការចូលលួច។

កាលពីប៉ុន្មានថ្ងៃកន្លងទៅនេះ រថយន្តជិត១០០គ្រឿង ដែលដឹកជញ្ជូនស្បៀងអាហារសម្រាប់ពលរដ្ឋប៉ាឡេស្ទីន ត្រូវបានចោរចូលលួចដោយហិង្សា ខណៈបានចូលទៅក្នុងតំបន់ហ៊ុមព័ទ្ធហ្កាហ្សា។

ទីភ្នាក់ងារអង្គការសហប្រជាជាតិចំនួនពីរ បានប្រាប់សារព័ត៌មាន Reuters ថា វាជាការខាតបង់ជំនួយច្រើនបំផុតមួយក្នុងរយៈពេល១៣ខែចុងក្រោយនៃសង្គ្រាម។ បុរសម្នាក់ និយាយថា «ស្ថានភាពពិបាកខ្លាំង» ហើយនេះជាផ្ទះបាយដាំស្លតែមួយគត់ ដែលមានអាហាររាល់ថ្ងៃ។

ក្បួនរថយន្ត ដែលត្រូវបានគេលួច បានដឹកជញ្ជូនស្បៀងអាហារផ្តល់ដោយទីភ្នាក់ងាររបស់អង្គការសហប្រជាជាតិ, UNRWA និងកម្មវិធីស្បៀងអាហារពិភពលោក(WFP)។

យោងតាមមន្រ្តីជំនួយជាន់ខ្ពស់របស់ទីភ្នាក់ងារ UNRWA លោក Louise Wateridge បាននិយាយឲ្យដឹងថា វាត្រូវបានណែនាំដោយអ៊ីស្រាអែលឱ្យចាកចេញ ដោយមានការជូនដំណឹងភ្លាមៗទៅតាមផ្លូវដែលពុំធ្លាប់ស្គាល់ពីច្រកឆ្លងកាត់ព្រំដែន Kerem Shalom។

ក្នុងចំណោមរថយន្តដឹកស្បៀងចំនួន១០៩គ្រឿង ៩៨គ្រឿង ត្រូវបានវាយឆ្មក់។

ក្រុមអ្នកប្រយុទ្ធមកពីក្រុមហាម៉ាស និងភាគីផ្សេងទៀតនៅតំបន់ហ្កាហ្សា បានបង្កើតកងកម្លាំងប្រដាប់អាវុធមួយក្រុមដើម្បីការពារក្រុមជនអន្ធពាលពីការប្លន់ក្បួនរថយន្តដឹកជំនួយ នៅក្នុងដែនដីដែលកំពុងប្រយុទ្ធគ្នា។