ក្រុមមនុស្សធម៌របស់អង្គការសហប្រជាជាតិ បាននិយាយកាលពីថ្ងៃអង្គារថា ការប៉ុនប៉ងរយៈពេលជាង ៤០ថ្ងៃ ត្រូវបានបដិសេធ ឬត្រូវបានរារាំង ដើម្បីផ្តល់ជំនួយដល់ប្រជាជនដែលកំពុងតស៊ូដើម្បីរស់ ខណៈស្ថិតនៅក្រោមការហ៊ុមព័ទ្ធនៅតំបន់ហ្កាហ្សាភាគខាងជើង។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយថា បេសកកម្មតាមគម្រោងចំនួន ២៧គម្រោង ក្នុងចំណោមបេសកកម្មចំនួន៣១គម្រោង ត្រូវបានច្រានចោល ហើយចំនួនបួនគម្រោងផ្សេងទៀត ត្រូវបានរារាំងយ៉ាងខ្លាំង ជាគម្រោងដើម្បីជួយប្រជាជននៅក្រុង Beit Hanoun, ក្រុងBeit Lahiya និងនៅផ្នែកមួយចំនួននៃក្រុង Jabalya ។

អង្គការ OCHA និយាយថា ហាងនំប៉័ង និងផ្ទះបាយនានា នៅក្នុងតំបន់ហ្កាហ្សាភាគខាងជើងបានបិទ ការជួយផ្នែកអាហារូបត្ថម្ភក៏ត្រូវបានផ្អាក ហើយការផ្គត់ផ្គង់ទឹកឡើងវិញ និងគ្រឿងបរិក្ខារអនាម័យ ត្រូវបានរារាំងទាំងស្រុង។

គណៈកម្មាធិការពិនិត្យគ្រោះទុរភិក្ស IPC របស់អង្គការសហប្រជាជាតិ បានព្រមានថា ផ្នែកមួយចំនួននៅភាគខាងជើងតំបន់ហ្កាហ្សា ប្រឈមហានិភ័យនៃគ្រោះទុរ្ភិក្សជិតមកដល់ ហើយចំណាត់ការបន្ទាន់គឺចាំបាច់ក្នុងរយៈពេលប៉ុន្មានថ្ងៃខាងមុខនេះ ពុំមែនប៉ុន្មានសប្តាហ៍នោះទេ។

ក្រុមមនុស្សធម៌ បាននិយាយថា នៅពេលឧប្បត្តិហេតុមនុស្សស្លាប់និងរងរបួសច្រើន ហើយការទម្លាក់គ្រាប់បែករបស់អ៊ីស្រាអែលនៅតែបន្ត ការចូលទៅកាន់មន្ទីរពេទ្យ Kamal Adwan, មន្ទីរពេទ្យ Al Awda និងមន្ទីរពេទ្យ Indonesian hospital នៅហ្កាហ្សាខាងជើង នៅតែមានការរឹតត្បិតយ៉ាងខ្លាំង ក្នុងពេលមានការខ្វះការផ្គត់ផ្គង់ផ្នែកវេជ្ជសាស្ត្រ កង្វះនៅក្នុងអង្គភាពផ្តល់ឈាម និងខ្វះប្រេងឥន្ធនៈ។

អង្គការ OCHA បាននិយាយថា ការប៉ុនប៉ងធ្វើឡើងដោយដៃគូសុខភាពរបស់យើង ក្នុងការដាក់ពង្រាយក្រុមគ្រូពេទ្យសង្គ្រោះបន្ទាន់អន្តរជាតិ ដើម្បីពង្រីកសមត្ថភាព នៅតែត្រូវបានរារាំងដោយអាជ្ញាធរអ៊ីស្រាអែល។