អង្គការសុខភាពពិភពលោក (WHO) កាលពីថ្ងៃអង្គារ (១៩ វិច្ឆិកា) បានអនុម័តវ៉ាក់សាំងជំងឺអុតស្វា ឬហៅថា អឹមផក (Mpox) ពីក្រុមហ៊ុនឱសថជប៉ុន ខេអ៊ឹម បាយអូឡូជីកស៍ (KM Biologics) សម្រាប់ការប្រើប្រាស់ក្នុងស្ថានភាពបន្ទាន់ ហើយនេះជាថ្នាំបង្កាទីពីរដែលទទួលបានការយល់ព្រមពីស្ថាប័នសុខភាពពិភពលោកនេះ។

WHO បាននិយាយថា ខ្លួនបានផ្តល់ការអនុញ្ញាតឱ្យចុះបញ្ជីការប្រើប្រាស់បន្ទាន់ (EUL) ដល់វ៉ាក់សាំង LC16m8 ដើម្បី "សម្រួលដល់ការទទួលបានវ៉ាក់សាំងដែលកើនឡើង និងទាន់ពេលវេលា នៅក្នុងសហគមន៍ដែលជួបការរីករាលដាលនៃមេរោគអុតស្វា"។

ការចុះបញ្ជីការប្រើប្រាស់បន្ទាន់របស់ WHO បានត្រួសត្រាយផ្លូវសម្រាប់ប្រទេសនានាជុំវិញពិភពលោក ក្នុងការអនុម័ត និងនាំចូលវ៉ាក់សាំងនេះយ៉ាងឆាប់រហ័ស ដើម្បីចែកចាយ។ កួរបញ្ជាក់ថា ក្នុងខែកញ្ញា WHO បានអនុម័តជាមុនរួចហើយនូវវ៉ាក់សាំងមួយទៀតប្រឆាំងនឹងវីរុសអុតស្វា ឈ្មោះថា MVA-BN របស់ក្រុមហ៊ុន បាវ៉ារៀន-ន័រឌីក (Bavarian-Nordic) ក្នុងបំណងជួយបង្កើនការប្រយុទ្ធប្រឆាំងនឹងការរីករាលដាលមេរោគអុតស្វា។

ទីភ្នាក់ងារសុខភាពរបស់អង្គការសហប្រជាជាតិមួយនេះ កាលពីខែសីហា បានប្រកាសភាពអាសន្នអន្តរជាតិថ្មីលើជំងឺអុតស្វា ស្របពេលមានក្ដីបារម្ភកាន់តែខ្លាំងឡើងចំពោះការកើនឡើងនៃមេរោគប្រភេទថ្មី ក្លេដ ១ប៊ី (Clade 1b) នៅក្នុងសាធារណរដ្ឋប្រជាធិបតេយ្យកុងហ្គោ ដែលរីករាលដាលដល់ប្រទេសជិតខាង។ WHO និយាយថា វីរុសថ្មីនោះ និងវីរុសអុតស្វាប្រភេទផ្សេងទៀតត្រូវបានរាយការណ៍នៅទូទាំង ៨០ប្រទេស ដែលក្នុងនោះមាន ១៩ប្រទេស នៅក្នុងទ្វីបអាហ្រ្វិក រហូតមកដល់ពេលនេះ៕