មូលនិធិរូបិយវត្ថុអន្តរជាតិ (IMF) បានព្រមានកាលពីថ្ងៃអង្គារ (១៩ វិច្ឆិកា) ថា ពន្ធគយ "សងសឹក" អាចប៉ះពាល់ដល់ការរំពឹងទុកសេដ្ឋកិច្ចរបស់អាស៊ី បង្កើនថ្លៃចំណាយ និងរំខានដល់ខ្សែច្រង្វាក់ផ្គត់ផ្គង់ ទោះបីជាគេរំពឹងថាតំបន់នេះនៅតែជាក្បាលម៉ាស៊ីនសំខាន់នៃកំណើនសេដ្ឋកិច្ចពិភពលោកក៏ដោយ។

នាយក IMF ប្រចាំតំបន់អាស៊ីប៉ាស៊ីហ្វិក លោក គ្រីស្នា ស្រីនីវ៉ាសាន (Krishna Srinivasan) បាននិយាយនៅក្នុងវេទិកាមួយស្តីពីហានិភ័យជាប្រព័ន្ធថា "ពន្ធសងសឹកគំរាមកំហែងរំខានដល់ការរំពឹងទុកនៃកំណើននៅទូទាំងតំបន់ ដែលនាំឱ្យខ្សែច្រង្វាក់ផ្គត់ផ្គង់កាន់តែយូរ និងមានប្រសិទ្ធភាពតិចជាងមុន"។

ការលើកឡើងរបស់លោក Srinivasan បានកើតឡើងស្របពេលមានក្ដីបារម្ភអំពីផែនការរបស់ប្រធានាធិបតីជាប់ឆ្នោតអាមេរិក លោក Donald Trump ក្នុងការដាក់ពន្ធ ៦០% លើទំនិញចិន និងពន្ធយ៉ាងតិច ១០% លើការនាំចូលផ្សេងទៀតទាំងអស់។

ពន្ធគយអាចរារាំងពាណិជ្ជកម្មសកល រារាំងកំណើនក្នុងបណ្ដាប្រទេសនាំចេញ និងអាចបង្កើនអតិផរណានៅក្នុងសហរដ្ឋអាមេរិក ដោយបង្ខំឱ្យធនាគារកណ្តាលអាមេរិករឹតបន្តឹងគោលនយោបាយរូបិយវត្ថុ បើទោះបីជាមានចក្ខុវិស័យមិនសូវល្អសម្រាប់កំណើនពិភពលោកក៏ដោយ៕