អង្គការអ៊ីស្រាអែល Amana ជាចលនាដែលគាំទ្រការតាំងទីលំនៅ ក្នុងតំបន់វេសបែងដែលគ្រប់គ្រងដោយអ៊ីស្រាអែល កាលពីថ្ងៃអង្គារ បានថ្កោលទោសទណ្ឌកម្មដែលដាក់ដោយសហរដ្ឋអាមេរិក កាលពីថ្ងៃចន្ទ។

សេចក្តីថ្លែងការណ៍មួយរបស់ក្រុមនេះ បាននិយាយថា ការដាក់ទណ្ឌកម្មនេះ «កើតចេញពីការបង្កាច់បង្ខូចដែលគ្មានមូលដ្ឋានសំដៅទៅលើអង្គការ Amana ដោយអរិភាព និងក្រុមជ្រុលនិយម»។

សេចក្តីថ្លែងការណ៍បានលើកឡើងថា៖«ប្រសិនបើរដ្ឋបាលអាមេរិក មិនយកចិត្តទុកដាក់ក្នុងការផ្ទៀងផ្ទាត់ការអះអាងនេះ នោះនឹងរកឃើញថា ពួកគេពិតជាគ្មានមូលដ្ឋានច្បាស់លាស់ និងត្រូវបញ្ឈប់ចាត់វិធានការប្រឆាំងនឹងយើង»។

អាជ្ញាធរអាមេរិក បាននិយាយកាលពីថ្ងៃចន្ទថា ពួកគេនឹងដាក់ទណ្ឌកម្មលើអង្គការ Amana និងសាខា របស់ខ្លួនគឺ Binyanei Bar Amana ក៏ដូចជាអ្នកផ្សេងទៀតដែលមាន«ទំនាក់ទំនងជាមួយអ្នកប្រព្រឹត្តអំពើហិង្សា នៅតំបន់វេសបែង»។

ក្រសួងរតនាគារសហរដ្ឋអាមេរិក បាននិយាយថា៖«អង្គការ Amana គឺជាផ្នែកមួយដ៏សំខាន់នៃចលនាតាំងទីលំនៅរបស់ក្រុមជ្រុលនិយមអ៊ីស្រាអែល និងរក្សាទំនាក់ទំនងជាមួយមនុស្សផ្សេងៗ ដែលត្រូវបានដាក់ទណ្ឌកម្មពីមុនដោយរដ្ឋាភិបាលសហរដ្ឋអាមេរិក និងដៃគូរបស់ខ្លួនចំពោះការប្រព្រឹត្តអំពើហិង្សា នៅតំបន់វេសបែង»។

ក្រសួងបានបន្ថែមថា៖«កាន់តែទូលំទូលាយទៀតនោះ អង្គការនេះ ប្រើយុទ្ធសាស្ត្រ កន្លែងធ្វើកសិកម្ម ដែលខ្លួនគាំទ្រ តាមរយៈការផ្តល់ហិរញ្ញប្បទាន ប្រាក់កម្ចី និងការកសាងហេដ្ឋារចនាសម្ព័ន្ធ ដើម្បីពង្រីកការតាំងទីលំនៅ និងរឹបអូសយកដីធ្លី»។

ការតាំងទីលំនៅទាំងអស់នៅតំបន់វេសបែង ដែលអ៊ីស្រាអែលបានកាន់កាប់ តាំងពីឆ្នាំ ១៩៦៧ គឺខុសច្បាប់ ក្រោមច្បាប់អន្តរជាតិ។