រដ្ឋមន្ត្រីការពារជាតិអាមេរិក លោក Lloyd Austin បានចេញសញ្ញាព្រមានដល់ប្រទេសចិន ជុំវិញបញ្ហាសមុទ្រចិនខាងត្បូង កាលពីថ្ងៃអង្គារ (ទី១៩ ខែវិច្ឆិកា) ដោយសង្កត់ធ្ងន់ថា សហរដ្ឋអាមេរិកនឹងការពារប្រទេសហ្វីលីពីន ប្រសិនបើកងកម្លាំងហ្វីលីពីនប្រឈមនឹងការវាយប្រហារដោយប្រដាប់អាវុធ។

លោក Austin កំពុងទៅទស្សនាខេត្ត Palawan របស់ហ្វីលីពីន ដែលមានទីតាំងនៅជាប់នឹងតំបន់ដែនសមុទ្រមានជម្លោះ។ ហើយលោកត្រូវបានសួរអំពីការបន្តជំនួយយោធារបស់សហរដ្ឋអាមេរិកដល់ហ្វីលីពីន ក្រោមការគ្រប់គ្រងនាពេលខាងមុខរបស់ប្រធានាធិបតី លោក Donald Trump ក្នុងនោះរួមទាំងទឹកប្រាក់ចំនួន ៥០០លានដុល្លារ នៅក្នុងមូលនិធិយោធាថ្មីផងដែរ។ លោក Austin បានបង្ហាញពីការជឿជាក់ថា សម្ព័ន្ធភាពអាមេរិក និងហ្វីលីពីន នឹងឆ្លងកាត់ដំណាក់កាលអន្តរកាលនយោបាយនេះបាន។ 

ដោយនិយាយសំដៅដល់ប្រទេសចិន តាមរយៈឈ្មោះផ្លូវការ គឺសាធារណរដ្ឋប្រជាមានិតចិន (PRC) លោក Austin បានប្រាប់ថា៖ «យើងឈរជាមួយហ្វីលីពីន ហើយយើងថ្កោលទោសចំពោះសកម្មភាពដ៏គ្រោះថ្នាក់របស់ PRC ប្រឆាំងនឹងប្រតិបត្តិការហ្វីលីពីន ស្របច្បាប់នៅសមុទ្រចិនខាងត្បូង»។ ប្រមុខការពារជាតិអាមេរិករូបនេះបានបន្ថែមថា លោកបារម្ភអំពីការកើនឡើងនូវយុទ្ធសាស្ត្រប្រឈមមុខដាក់គ្នារបស់ចិន នៅក្នុងតំបន់នេះ។

គួរបញ្ជាក់ថា រដ្ឋបាលរបស់លោក Joe Biden បានប្រឹងប្រែងធ្វើការ ដើម្បីពង្រឹងសម្ព័ន្ធមិត្តយោធា នៅទូទាំងតំបន់ឥណ្ឌូ-ប៉ាស៊ីហ្វិក ដើម្បីទប់ទល់នឹងប្រទេសចិន ជាពិសេសជុំវិញបញ្ហាកោះតៃវ៉ាន់ និងសមុទ្រចិនខាងត្បូងដែលមានជម្លោះ។ ចំណែកប្រធានាធិបតីហ្វីលីពីន លោក Ferdinand Marcos Jr. បានស្វែងរកការពង្រឹងសមត្ថភាពការពាររបស់ប្រទេសលោក។ លោក Marcos បានបញ្ជាក់ជាថ្មីពីការប្តេជ្ញាចិត្តរបស់លោក ចំពោះទំនាក់ទំនង រវាងសហរដ្ឋអាមេរិក និងហ្វីលីពីន ទោះស្ថិតក្រោមការដឹកនាំរបស់ប្រធានាធិបតីរូបណាក៏ដោយ៕