នាយករដ្ឋមន្ត្រីអ៊ីរ៉ាក់ លោក អាម៉េដ សៀ អាល់ ស៊ូដានី (Mohammed Shia al-Sudani) កាលពីថ្ងៃអង្គារ បានថ្កោលទោសចំពោះលិខិតមួយច្បាប់ដែលអ៊ីស្រាអែល បានផ្ញើជូនក្រុមប្រឹក្សាសន្តិសុខអង្គការសហប្រជាជាតិថា ជា«លេសដើម្បីបង្ហាញពីភាពត្រឹមត្រូវនៃការឈ្លានពានប្រឆាំងនឹងអ៊ីរ៉ាក់ និងការប៉ុនប៉ង ដើម្បីពង្រីកសង្រ្គាម ដែលកំពុងបន្តនៅក្នុងតំបន់»។

យោងតាមសេចក្តីថ្លែងការណ៍របស់ការិយាល័យប្រព័ន្ធផ្សព្វផ្សាយរបសលោក លោក អាល់ ស៊ូដានី បានបញ្ជាក់ជាថ្មីពីការបដិសេធរបស់អ៊ីរ៉ាក់ចំពោះការគំរាមកំហែងរបស់អ៊ីស្រាអែល ដោយសង្កត់ធ្ងន់ថា ការសម្រេចចិត្តនៃសង្គ្រាម និងសន្តិភាព ត្រូវតែមានការទទួលខុសត្រូវចំពោះរដ្ឋអ៊ីរ៉ាក់។

លោកនាយករដ្ឋមន្ត្រី បានបញ្ជាក់យ៉ាងច្បាស់ថា អ៊ីរ៉ាក់បានបដិសេធមិនឲ្យទាញចូលក្នុងសង្រ្គាម ខណៈពេលដែលរក្សាជំហរជាគោលការណ៍របស់ខ្លួន ក្នុងការបញ្ចប់ជម្លោះ និងការផ្តល់ជំនួយមនុស្សធម៌ដល់ប្រជាជនប៉ាឡេស្ទីន និងលីបង់។

រដ្ឋមន្ត្រីការបរទេសអ៊ីស្រាអែល លោក Gideon Sa'ar កាលពីថ្ងៃចន្ទ បានផ្ញើលិខិតមួយច្បាប់ទៅកាន់ក្រុមប្រឹក្សាសន្តិសុខអង្គការសហប្រជាជាតិ ដោយស្នើដល់ក្រុមប្រឹក្សានេះ ដាក់សម្ពាធលើរដ្ឋាភិបាល          អ៊ីរ៉ាក់ឲ្យបញ្ចប់ការវាយប្រហារដោយក្រុមជីវពលដែលគាំទ្រដោយអ៊ីរ៉ង់ នៅក្នុងប្រទេសអ៊ីរ៉ាក់ប្រឆាំងនឹងអ៊ីស្រាអែល។