ប្រធានគណបក្ស បានប្រាប់ឲ្យដឹងថា រដ្ឋាភិបាលសំឡេងភាគតិចថ្មីរបស់នាយករដ្ឋមន្ត្រីជប៉ុន លោក Shigeru Ishiba នៅថ្ងៃពុធ (ទី២០ ខែវិច្ឆិកា) នេះ បានទទួលបានការគាំទ្រពីក្រុមប្រឆាំងដ៏មានឥទ្ធិពលសម្រាប់កញ្ចប់ថវិកាជំរុញសេដ្ឋកិច្ច។

ការទទួលបាននូវលទ្ធផលបោះឆ្នោតដ៏អាក្រក់បំផុតរបស់គណបក្សប្រជាធិបតេយ្យសេរី (LDP) ក្នុងរយៈពេល ១៥ឆ្នាំ កាលពីខែមុន បានធ្វើឲ្យរដ្ឋាភិបាលចម្រុះដែលកំពុងកាន់អំណាចរបស់លោក Ishiba ខ្វះសំឡេងភាគច្រើន ហើយត្រូវការការគាំទ្រពីគណបក្សប្រឆាំង ដើម្បីអនុម័តច្បាប់។

នៅថ្ងៃទី២០ ខែវិច្ឆិកា ប្រធានគណបក្សដ៏តូចមួយ គឺបក្សប្រជាធិបតេយ្យដើម្បីប្រជាជន (DPP) បាននិយាយថា ខ្លួនឈានដល់កិច្ចព្រមព្រៀងមួយ ដើម្បីគាំទ្រកញ្ចប់ថវិកាជំរុញសេដ្ឋកិច្ច ដែលបង្កើតឡើងដោយគណបក្ស LDP របស់លោក Ishiba និងគណបក្សសម្ព័ន្ធយុវជន Komeito។

សេចក្ដីរាយការណ៍ពីប្រព័ន្ធផ្សព្វផ្សាយ បានឲ្យដឹងថា បណ្ដុំនៃវិធានការ ដែលត្រូវបានបង្កើតឡើង ក្នុងគោលបំណងបន្ធូរបន្ថយកំហឹងសាធារណៈ ចំពោះការកើនឡើងតម្លៃដែលបានរួមចំណែកដល់លទ្ធផលបោះឆ្នោត នៅខែតុលា អាចត្រូវបានអនុម័តដោយគណៈរដ្ឋមន្ត្រីនៅថ្ងៃទី២២ ខែវិច្ឆិកា។

របាយការណ៍ប្រព័ន្ធផ្សព្វផ្សាយបាននិយាយថា ជាថ្នូរនឹងការគាំទ្រនេះ គណបក្ស LDP និង Komeito បានយល់ព្រមលើសំណើរបស់គណបក្ស DPP ដើម្បីលុបចោលការកម្រិតខ្ពស់បំផុត សម្រាប់ប្រាក់ចំណូលប្រចាំឆ្នាំដោយមិនបង់ពន្ធលើសពី ១,០៣លានយ៉េន (ប្រមាណជិត ៧.០០០ដុល្លារ)៕