នៅថ្ងៃពុធនេះ ក្រុមប្រជាកសិករបារាំង នាំគ្នាបិទផ្លូវហាយវ៉េដែលតភ្ជាប់ប្រទេសបារាំង និងប្រទេសអេស្ប៉ាញ ស្របពេលដែលបាតុកម្មនៅតែបន្តនៅទូទាំងប្រទេស ជុំវិញកិច្ចប្រជុំពាណិជ្ជកម្មសេរីសហភាពអឺរ៉ុប-ម៉េកូស័រ(EU-Mercosur) ។

ការជំរុញឲ្យបញ្ចប់កិច្ចព្រមព្រៀងពាណិជ្ជកម្មរវាងសហភាពអឺរ៉ុប និងក្រុមប្រទេសអាមេរិកខាងត្បូងនៅក្នុងប្លុកម៉េកូស័រ បានធ្វើឲ្យមានការមិនពេញចិត្តរបស់កសិករចំពោះការប្រកួតប្រជែងមិនយុត្តិធម៌ និយតកម្មបន្ទុក និងប្រាក់ចំណូលកសិកម្មទាប ។

លោក Benjamin Bejada គឺជាកសិករគ្រាប់ធុញ្ញជាតិមួយរូប និយាយថា ពួកយើងសូមធ្វើការប្រឆាំងចំពោះកិច្ចព្រមព្រៀងពាណិជ្ជកម្ម EU-Mercosur ដោយសារតែវានឹងសម្លាប់កសិកម្មបារាំង ដោយសារពួកយើងមិនអាចប្រកួតប្រជែងគ្នាដោយយុត្តិធម៌ត្រឹមត្រូវ ចាប់តាំងពីមនុស្សទាំងអស់នេះ ពុំគោរពច្បាប់បរិស្ថានតែមួយដូចជាពួកយើង ។ វាពុំអាចទទួលយកបាននោះទេ ។

ក្រុមប្រជាកសិករខឹងសម្បារនាំគ្នាបិទច្រក Le Boulou ស្ថិតនៅលើផ្លូវហាយវ៉េបារាំង A49ឆ្ពោះទៅកាន់ខេត្ត Perpignan និងខេត្ត Montpellier ជាមួយនឹងកង់រថយន្ត និងត្រាក់ទ័ររបស់ពួកគេ ធ្វើឲ្យរថយន្តកកស្ទះជាខ្សែយ៉ាងវែង មិនអាចចូលទៅក្នុងប្រទេសបារាំងបាន ។

ក្រុមសហគមន៍ជីប Coordination Rurale ដែលឈរនៅពីក្រោយបាតុកម្មនេះ បានគំរាមបិទកំពង់ផែ និងមជ្ឈមណ្ឌលចែកចាយទំនិញផងដែរ ដើម្បីរឹតត្បិតការផ្គត់ផ្គង់ស្បៀងអាហារ បើសិនជាក្រុមអាជ្ញាធរមិនប្រកាសវិធានការបន្ទាន់ទេនោះ ៕