យោងតាមសារព័ត៌មាន Al Jazeera Arabic បានឱ្យដឹងថា កងកម្លាំងអ៊ីស្រាអែលកំពុងវាយលុកភាគខាងជើងតំបន់ហ្កាហ្សា សម្លាប់ជនជាតិប៉ាឡេស្ទីនចំនួន ៨៨ នាក់ក្នុងការវាយប្រហារពីរលើកលើសង្កាត់ Beit Lahiya និងសង្កាត់ Sheikh Radwan នៃទីក្រុងហ្កាហ្សា។ចំនួនពលរដ្ឋហ្កាហ្សាស្លាប់បានឡើងដល់ជិត៤៤.០០០នាក់ ខណៈអ៊ីស្រាអែលសម្រុកទម្លាក់គ្រាប់បែកពីលើអាកាសឥតឈប់ឈរ។

សហរដ្ឋអាមេរិក បានប្រើសិទ្ធិវ៉េតូសេចក្តីសម្រេចក្រុមប្រឹក្សាសន្តិសុខអង្គការសហប្រជាជាតិទាមទារឲ្យមានបទឈប់បាញ់បន្ទាន់នៅដែនដីហ្កាហ្សាក្នុងសង្គ្រាមរវាងអ៊ីស្រាអែល-ក្រុមហាម៉ាស ដោយអាមេរិកបាននិយាយថា សេចក្ដីសម្រេចកាលពីថ្ងៃពុធមិនពាក់ព័ន្ធនឹងការដោះលែងចំណាប់ខ្មាំងជាបន្ទាន់ដែលក្រុមហាម៉ាសនៅតែបន្តឃុំខ្លួនទុកនៅឡើយ។

ទន្ទឹមនឹងនោះ ក្នុងប្រទេសលីបង់ កិច្ចព្រមព្រៀងឈប់បាញ់រវាងអ៊ីស្រាអែល និងក្រុមហេសបូឡា កំពុងបង្ហាញសញ្ញានៃវឌ្ឍនភាព។ ទោះយ៉ាងណាក៏ដោយ រដ្ឋមន្ត្រីការពារជាតិអ៊ីស្រាអែល និយាយថា ប្រទេសរបស់លោកចង់បានសិទ្ធិធ្វើសកម្មភាពយោធាប្រឆាំងនឹងក្រុមហេសបូឡា ក្នុងកិច្ចព្រមព្រៀងណាមួយ ដើម្បីបញ្ចប់ការប្រយុទ្ធ។

យោងតាមក្រសួងសុខាភិបាលលីបង់ ការវាយប្រហារ និងការប្រយុទ្ធរបស់អ៊ីស្រាអែលនៅលីបង់បានសម្លាប់មនុស្សជាង៣,៥០០នាក់ និងរបួស១៥,០០០នាក់ ។ សង្គ្រាមបានធ្វើឲ្យមនុស្សជិត ១,២ លាននាក់រត់ភៀសខ្លួនចេញពីលំនៅឋាន ឬមួយភាគបួននៃចំនួនប្រជាជនលីបង់។

ខាងអ៊ីស្រាអែលវិញ ទាហានចំនួន៨៧នាក់ និងជនស៊ីវិល ៥០នាក់ រួមទាំងកម្មករបរទេសធ្វើការតាមមកសិដ្ឋានមួយចំនួន ត្រូវបានសម្លាប់ដោយគ្រាប់រ៉ូកែត យានដ្រូន និងមីស៊ីល។ ក្រុមហេសបូឡាបានចាប់ផ្តើមបាញ់ចូលអ៊ីស្រាអែលមួយថ្ងៃបន្ទាប់ពីការវាយប្រហាររបស់ក្រុមហាម៉ាសកាលពីថ្ងៃទី ៧ ខែតុលាឆ្នាំ ២០២៣ បង្កឱ្យជម្លោះអូសបន្លាយដល់សព្វថ្ងៃនេះ នៅក្នុងដែនដីហ្កាហ្សា៕