ជនអន្តោប្រវេសន៍រាប់ពាន់នាក់ កាលពីថ្ងៃពុធ បានធ្វើដំណើរចេញពីភាគខាងត្បូងប្រទេសម៉ិកស៊ិក ក្នុងគោលដៅឆ្ពោះទៅកាន់ព្រំដែនសហរដ្ឋអាមេរិក មុនពេលប្រធានាធិបតីជាប់ឆ្នោត លោក Donald Trump ចូលកាន់តំណែង ក្នុងបំណងគេចចេញពីវិធានការត្រួតពិនិត្យអន្តោប្រវេសន៍ដ៏តឹងតែង។

ក្បួនដំណើរ ដែលកំណត់ពេលចេញដំណើរភ្លាមៗក្រោយម៉ោង៥ព្រឹក ម៉ោងក្នុងតំបន់ ជនអន្តោប្រវេសន៍រួមមាន អាមេរិកកណ្តាល និងអាមេរិកខាងត្បូង បានធ្វើដំណើរពីទីក្រុង Tapachula ទៅកាន់ទីក្រុង Huehuetan ។

ជនអន្តោប្រវេសន៍ទាំងអស់ សង្ឃឹមថាប្រព័ន្ធណាត់ជួបសុំសិទ្ធិជ្រកកោន CBP-ONE នឹងបន្តប្រតិបត្តិការក្នុងពេលប៉ុន្មានសប្តាហ៍ខាងមុខនេះ។

ជនអន្តោប្រវេសន៍ ក៏បានអំពាវនាវដល់រដ្ឋាភិបាលប្រទេសម៉ិកស៊ិក អនុញ្ញាតឱ្យមានការធ្វើដំណើរដោយសេរី ឆ្លងកាត់ប្រទេសដើម្បីជួយសម្រួលបានទៅដល់សហរដ្ឋអាមេរិក។

ក្នុងរយៈពេលប៉ុន្មានឆ្នាំចុងក្រោយនេះ ក្បួនដំណើរជាច្រើនរបស់ជនអន្តោប្រវេសន៍ សង្ឃឹមថា នឹងចូលទៅដល់សហរដ្ឋអាមេរិក ដោយបានព្យាយាមទៅដល់ព្រំដែនសហរដ្ឋអាមេរិក-ម៉ិកស៊ិក ធ្វើដំណើរជាក្រុមធំដើម្បីសុវត្ថិភាពរបស់ពួកគេ។