ទូរទស្សន៍រដ្ឋ ORTM បាននិយាយកាលពីថ្ងៃពុធ ទី២០ ខែវិច្ឆិកា ថា នាយករដ្ឋមន្ត្រីរបស់ប្រទេសម៉ាលី លោក ឆូហ្គែល ម៉ៃហ្គា(Choguel Maiga) ត្រូវបានបណ្តេញចេញពីតំណែង ដែលស្ថិតក្នុងចំណោមជនស៊ីវិលដែលបានរិះគន់ការបរាជ័យរបស់របបយោធាកំពុងកាន់អំណាច ក្នុងការរៀបចំការបោះឆ្នោត ក្នុងការផ្លាស់ប្តូររយៈពេល២៤ ខែ ដែលបានសន្យា ត្រឡប់ទៅរកលទ្ធិប្រជាធិបតេយ្យវិញ។

មេដឹកនាំយោធា ដែលបានដណ្តើមអំណាចក្នុងរដ្ឋប្រហារជាបន្តបន្ទាប់ក្នុងឆ្នាំ ២០២០ និងឆ្នាំ ២០២១ បានសន្យាថានឹងរៀបចំការបោះឆ្នោតនៅខែកុម្ភៈ ប៉ុន្តែបានពន្យារពេលការបោះឆ្នោតដោយគ្មានកំណត់សម្រាប់ហេតុផលបច្ចេកទេស។ កាលពីសប្តាហ៍មុន លោក ម៉ៃហ្គា(Maiga) បាននិយាយថា ពុំមានការជជែកដេញដោលលើការពន្យារពេលការបោះឆ្នោតនៅក្នុងរដ្ឋាភិបាលនោះទេ ហើយលោក បានដឹងពីការសម្រេចចិត្តរបស់របបយោធា ពីប្រព័ន្ធផ្សព្វផ្សាយ។

ប្រភពព័ត៌មានស្និទ្ធទៅនឹងលោក Maiga បានប្រាប់សារព័ត៌មានរ៉យទ័រថា ការអត្ថាធិប្បាយរបស់លោក បង្កឱ្យមានភាពតានតឹងជាមួយរបបយោធា ដោយបង្ខំឱ្យពន្យារពេលកិច្ចប្រជុំគណៈរដ្ឋមន្ត្រីដែលគ្រោងធ្វើកាលពីថ្ងៃពុធ។

លោក Maiga បានការពាររបបយោធាម៉ាលីយ៉ាងក្លៀវក្លា ខណៈប្រទេសជិតខាងអាហ្វ្រិកខាងលិច និងសម្ព័ន្ធមិត្តអន្តរជាតិ បានរិះគន់កិច្ចសហប្រតិបត្តិការយោធារបស់ប្រទេសនេះ ជាមួយទាហានស៊ីឈ្នួលរុស្ស៊ី និងការពន្យារពេលបោះឆ្នោតម្តងហើយម្តងទៀត។

មុនពេលត្រូវបានតែងតាំងជានាយករដ្ឋមន្ត្រីនៅឆ្នាំ២០២១ លោក Maiga បានបម្រើការជារដ្ឋមន្ត្រីក្រសួងពាណិជ្ជកម្មរបស់ប្រទេសម៉ាលី ក្រោមការដឹកនាំរបស់អតីតប្រធានាធិបតី លោក Amadou Toumani Toure និងជារដ្ឋមន្ត្រីសេដ្ឋកិច្ចឌីជីថលក្រោមការដឹកនាំរបស់អតីតប្រធានាធិបតី លោក Ibrahim Boubacar Keita ។