សហរដ្ឋអាមេរិក បានបើកស្ថានទូតរបស់ខ្លួនឡើងវិញក្នុងទីក្រុងគីវ វកាលពីល្ងាចថ្ងៃពុធ (២០ វិច្ឆិកា) បន្ទាប់ពីបានបិទរយៈពេលមួយថ្ងៃ ដោយសារតែ "ការគំរាមកំហែងនៃការវាយប្រហារតាមអាកាសដ៏ធំមួយ" មួយថ្ងៃបន្ទាប់ពីអ៊ុយក្រែន បានប្រើមីស៊ីលរបស់អាមេរិក ទៅវាយប្រហារគោលដៅជ្រៅនៅក្នុងទឹកដីរុស្ស៊ី។

ទីក្រុងមូស្គូ បានហៅការវាយប្រហារនោះថាជាបង្កើនសង្គ្រាម ដែលមានរយៈពេល ១.០០០ថ្ងៃ ខណៈទីភ្នាក់ងារចារកម្មយោធាអ៊ុយក្រែន បាននិយាយថា រុស្ស៊ីកំពុងព្យាយាមធ្វើឱ្យមានការភ័យស្លន់ស្លោដោយផ្សព្វផ្សាយសារក្លែងក្លាយតាមអ៊ីនធឺណិតអំពីការវាយប្រហារដោយមីស៊ីល និងយានដ្រូន។

ឯកអគ្គរដ្ឋទូតសហរដ្ឋអាមេរិកប្រចាំនៅអ៊ុយក្រែន លោកស្រី Bridget Brink បានសរសេរនៅលើបណ្ដាញសង្គម X ថា "ស្ថានទូតអាមេរិកនៅទីក្រុងគីវ បានបន្តសេវាកម្មឡើងវិញ បន្ទាប់ពីផ្អាកបណ្តោះអាសន្ននៅដើមថ្ងៃនេះ"។ ក្រសួងការបរទេសអាមេរិក បាននិយាយមុននោះថា ខ្លួនរំពឹងថា ស្ថានទូតទីក្រុងគីវ នឹងចាប់ផ្តើមប្រតិបត្តិការធម្មតាឡើងវិញនៅថ្ងៃព្រហស្បតិ៍ (២១ វិច្ឆិកា) នេះ។

ប្រភពរដ្ឋាភិបាលអាមេរិក និយាយថា ការបិទស្ថានទូតនេះគឺទាក់ទងនឹងការគំរាមកំហែងនៃការវាយប្រហារផ្លូវអាកាសជាបន្តបន្ទាប់។ ស្ថានទូតអ៊ីតាលី និងក្រិក និយាយថា ពួកគេក៏បានបិទទ្វារផងដែរ ខណៈស្ថានទូតបារាំងនៅតែបើកដំណើរការ ប៉ុន្តែបានដាស់តឿនពលរដ្ឋខ្លួនឱ្យប្រុងប្រយ័ត្ន៕