ព្យុះដ៏ខ្លាំងក្លាចំនួន ៦លើកនៅចុងរដូវដែលបានបំផ្លិចបំផ្លាញដំណាំ និងតំបន់នានាដ៏ធំទូលាយនៃហ្វីលីពីន បានធ្វើឱ្យប្រទេសនេះស្ថិតលើផ្លូវនៃការនាំចូលអង្ករពីក្រៅប្រទេស និងបានបង្កើនការព្រួយបារម្ភអំពីកំណើនអតិផរណាស្បៀងអាហារ រួមទាំងការគំរាមកំហែងដល់កំណើនសេដ្ឋកិច្ច។

ចាប់ពីចុងខែតុលា ដល់ពាក់កណ្តាលខែវិច្ឆិកា ខ្យល់ព្យុះបានបង្កភ្លៀងធ្លាក់ខ្លាំងបន្តបន្ទាប់លើតំបន់ភាគខាងជើង ដែលកំពុងរងការជន់លិចដ៏រីករាលដាល និងដីសើមឆ្អែត ដែលមិនអាចស្រូបទឹកបានទៀត។ គ្រោះមហន្តរាយនេះធ្វើឱ្យខាតប្រាក់យ៉ាងហោចណាស់ ១៣១លានដុល្លារ ពីការបាត់បង់ដំណាំ ដោយស្រូវទទួលរងការខូចខាតយ៉ាងខ្លាំង។

ពេលវេលាចុងក្រោយដែលព្យុះស៊ីក្លូនត្រូពិចចំនួន៦ បានវាយប្រហារផ្ទួនៗលើហ្វីលីពីន ក្នុងរយៈពេលបីសប្តាហ៍បែបនេះគឺនៅឆ្នាំ១៩៤៦ នេះបើយោងតាមលោកប្រធានាធិបតី Ferdinand Marcos Jr ដែលបាននិយាយថា ការនាំចូលអង្ករអាចកើនឡើងដល់ ៤,៥លានតោនក្នុងឆ្នាំ២០២៤ ដើម្បីបំពេញកង្វះខាតផ្គត់ផ្គង់។

រដូវព្យុះទីហ្វុងខ្ពស់បំផុតរបស់ហ្វីលីពីន គឺជាធម្មតានៅខែកក្កដា ដល់ខែតុលា ខណៈប្រទេសនេះស្ថិតនៅជួរមុខសម្រាប់ព្យុះទីហ្វុងនៅអាស៊ីប៉ាស៊ីហ្វិក ដោយមានព្យុះស៊ីក្លូនត្រូពិកប្រហែល២០ កើតឡើងជារៀងរាល់ឆ្នាំនៅជិតប្រជុំកោះ៕