លោក Philippe Lazzarini អគ្គស្នងការនៃទីភ្នាក់ងារជំនួយនិងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅតំបន់ដើមបូព៌ា (UNRWA) បាននិយាយកាលពីថ្ងៃពុធថា តំបន់ហ្កាហ្សា បានក្លាយជា «កន្លែងបញ្ចុះសព»សម្រាប់កុមារ។

លោក Lazzarini បានថ្លែងនៅក្នុងសេចក្តីថ្លែងការណ៍មួយក្នុងទិវាកុមារពិភពលោក ដែលត្រូវបានប្រារព្ធជារៀងរាល់ឆ្នាំ នៅថ្ងៃទី ២០ ខែវិច្ឆិកាថា៖«ពួកគេកំពុងត្រូវបានសម្លាប់ រងរបួស បង្ខំឲ្យភៀសខ្លួន និងដកហូតសុវត្ថិភាព ការអប់រំ និងការលេងកម្សាន្តជាដើម»។

លោក Lazzarini បាននិយាយថា៖«វ័យកុមារភាពរបស់ពួកគេ ត្រូវបានគេលួច ហើយពួកគេ គឺជិតក្លាយជាមនុស្សជំនាន់ក្រោយ ដោយបានបាត់បង់ការសិក្សាមួយឆ្នាំទៅហើយ»។

លោកបានកត់សម្គាល់ថា កុមារនៅតំបន់វេសបែង ( West Bank) កំពុងស៊ូទ្រាំនឹងការភ័យខ្លាច និងការថប់បារម្ភជាប្រចាំ។ ចាប់តាំងពីខែតុលា ឆ្នាំ ២០២៣ កុមារជាង ១៧០នាក់ ត្រូវបានសម្លាប់ ខណៈដែលពួកគេជាច្រើននាក់ផ្សេងទៀត បានបាត់បង់វ័យកុមារភាពរបស់ពួកគេ ដោយសារការជាប់នៅក្នុងមន្ទីរ ឃុំឃាំងរបស់អ៊ីស្រាអែល។

កាលពីថ្ងៃពុធ ជនជាតិប៉ាឡេស្ទីនជាច្រើនក្រុម បានអំពាវនាវឲ្យមានសកម្មភាពអន្តរជាតិ ដើម្បីការពារកុមារ នៅតំបន់ហ្កាហ្សា និងតំបន់វេសបែង ដោយបានលើកឡើងពីស្ថានភាពមនុស្សធម៌ដ៏មហន្តរាយ ដែលពួកគេកំពុងស៊ូទ្រាំ។

ក្រសួងការបរទេសប៉ាឡេស្ទីន បានចេញសេចក្តីថ្លែងការណ៍មួយ ដោយសង្កត់ធ្ងន់ថា កុមារគឺជាជនងាយរងគ្រោះបំផុត និងរងផលប៉ះពាល់ដោយការអនុវត្តរបស់អ៊ីស្រាអែល ដោយស៊ូទ្រាំនឹងលក្ខខណ្ឌធ្ងន់ធ្ងរ ដែលរំលោភលើសិទ្ធិជាមូលដ្ឋានរបស់ពួកគេ រួមទាំងសិទ្ធិរស់រានមានជីវិតផងដែរ។