ទីភ្នាក់ងារគ្រោះមហន្តរាយជាតិ បាននិយាយនៅថ្ងៃព្រហស្បតិ៍ ទី២១ ខែវិច្ឆិកានេះថា ចំនួនអ្នកស្លាប់ដោយសារព្យុះទីហ្វុងកំណាច Man-yi នៅក្នុងប្រទេសហ្វីលីពីន បានកើនឡើងដល់១២នាក់ ខណៈទឹកជំនន់ដែលរាលដាលបានស្រកចុះទៅវិញ។ 

ព្យុះទីហ្វុង Man-yi ដែលបាននាំមកនូវទឹកភ្លៀងបានជន់លិចភូមិជាច្រើន និងបានធ្វើឲ្យខូចខាតអគារមួយចំនួននៅក្នុងប្រទេសប្រជុំកោះមួយនេះកាលពីចុងសប្តាហ៍ ដោយបាននាំមកនូវល្បឿនខ្យល់បក់អតិបរមា១៨៥គីឡូម៉ែត្រ ក្នុងមួយម៉ោង។

វាគឺជាព្យុះធំទី៦ក្នុងរយៈពេលមួយខែមកនេះ ដែលបានបោកបក់លើប្រទេសហ្វីលីពីន។

រួមព្យុះទាំង៦លើកនេះ បណ្តាលឲ្យមនុស្សយ៉ាងហោចណាស់១៧៥នាក់ស្លាប់ និងមនុស្សរាប់ពាន់នាក់បានជម្លៀសខ្លួនចេញពីលំនៅឋាន ព្រមទាំងបានបំផ្លាញដំណាំ និងសត្វចិញ្ចឹម ផងដែរ។

ភាគច្រើននៃអ្នកស្លាប់ដាយសារព្យុះទីហ្វុង Man-yi គឺនៅតំបន់ភ្នំភាគខាងជើងនៃរដ្ឋធានីម៉ានីល រួមទាំងមនុស្ស៧នាក់ បានស្លាប់បន្ទាប់ពីបំណាក់ដីកប់លើលំនៅឋានរបស់ពួកគេ ក្នុងខេត្ត Nueva Vizcaya ។