ជនអន្តោប្រវេសន៍ ធ្វើដំណើរដល់ប្រជុំកោះ Canary របស់អេស្ប៉ាញក្នុងចំនួនកំណត់ត្រាប្រចាំឆ្នាំ ២០២៤នេះ ក្នុងនោះជនអន្តោប្រវេសន៍ជាង ៣៩.៧០០នាក់ បានមកដល់ទីនោះ គិតត្រឹមពាក់កណ្តាលខែវិច្ឆិកា ។

យោងតាមការអះអាងរបស់ក្រសួងមហាផ្ទៃអេស្ប៉ាញ បានឲ្យដឹងថា ចំនួនជនអន្តោប្រវេសន៍នេះ បានកើនឡើង ២៣ភាគរយ ពីរយៈពេល ១ឆ្នាំមុន ។

ដោយឡែកយោងតាមទីភ្នាក់ងារព្រំដែន Frontex បានឲ្យដឹងថា ចំនួននេះ គឺជាការកើនឡើងលឿនបំផុតនៃការមកដល់របស់ជនអន្តោប្រវេសន៍តាមសមុទ្រនៅគ្រប់ប្រទេសទាំងអស់របស់សហភាពអឺរ៉ុប ។

ប្រជុំកោះ Canary ស្ថិតនៅលើផ្លូវបំបែកកំណត់ត្រាចំនួនជនអន្តោប្រវេសន៍ខុសប្រក្រតី សម្រាប់ឆ្នាំទី ២ជាប់ៗគ្នា ។

Frontex រាយការណ៍ថា បណ្តាញរត់ពន្ធមនុស្សខុសច្បាប់ បង្កឡើងដោយសារអស្ថិរភាពនៅតំបន់ Sahel រួមទាំងនៅប្រទេសម៉ាលី ជាទីដែលជម្លោះក្លាយជាការអូសទាញដ៏សំខាន់នៃការកញ្ជ្រោលឡើងចំនួនជនអន្តោប្រវេសន៍ ។

ជនអន្តោប្រវេសន៍មកពីប្រទេសម៉ាលី និយាយថា ពួកយើងដែលជាក្មេងៗនៅក្នុងប្រទេសម៉ាលី លែងខ្លាចស្លាប់ទៀតហើយ ដោយសារពួកយើងបានមើលឃើញការស្លាប់គ្រប់រូបភាព និងគ្រប់ស្ថានភាពទាំងអស់ ។

ពួកគេបន្តថា បើសិនជាអ្នកបន្តរស់នៅប្រទេសម៉ាលី ឬជិះទូកឈើ អ្នកនឹងអាចស្លាប់ដូចគ្នា ដូច្នេះហើយវាមិនមែនជាបញ្ហានោះទេ ។

សូមបញ្ជាក់ថា ជនអន្តោប្រវេសន៍ម៉ាលីជិត ១ម៉ឺននាក់ បានធ្វើដំណើរទៅដល់ប្រជុំកោះ Canary ចន្លោះខែមករា និងខែសីហា ឆ្នាំ ២០២៤នេះ ៕