ស៊ីហ្គេម៖ ថ្នាក់ដឹកនាំគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានក្រើនរំឭកឲ្យគណៈកម្មការជំនាញទាំងអស់ត្រូវត្រៀមខ្លួនជានិច្ច ក្នុងការត្រៀមរៀបចំពិធីសម្ពោធវិមានកីឡដ្ឋាននៃពហុកីឡដ្ឋានជាតិមរតកតេជោ ឲ្យស័ក្ដិសមនឹងសមិទ្ធផល និងនិមិត្តរូបនៃចំណងមិត្តភាពដែកថែបដ៏យូរអង្វែងកម្ពុជា-ចិននេះ។
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC បានឲ្យដឹងថា មកទល់ពេលនេះនៅមិនទាន់កំណត់ពេលវេលាច្បាស់លាស់ ក្នុងការរៀបចំពិធីសម្ពោធវិមានកីឡដ្ឋាននៃពហុកីឡដ្ឋានជាតិមរតកតេជោនោះទេ តែថ្នាក់ដឹកនាំបានជំរុញឲ្យគ្រប់គណៈកម្មការជំនាញត្រូវត្រៀមខ្លួន ដើម្បីធ្វើពិធីសម្ពោធមួយដែលមានគុណតម្លៃប្រហាក់ប្រហែល និងភាពអស្ចារ្យសមនឹងសមិទ្ធផលដ៏អស្ចារ្យនេះ តែក៏ត្រូវគោរពវិធានការការពារកូវីដ-១៩ ផងដែរ។ តាមគម្រោងកាលពីថ្មីៗ ឯកឧត្តម វ៉ាត់ ចំរើន បានបញ្ជាក់ថា សំណង់ប្រវត្តិសាស្ដ្រត្រៀមពិធីបើក-បិទ និងការប្រកួតកីឡាស៊ីហ្គេម-អាស៊ានប៉ារ៉ាហ្គេមឆ្នាំ២០២៣ នេះ គ្រោងនឹងរៀបចំពិធីសម្ពោធដាក់ឲ្យប្រើប្រាស់ជាផ្លូវការនាចុងខែវិច្ឆិកា ឆ្នាំ២០២១ ខាងមុខ ដោយគ្រោងរៀបចំឡើងក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងមន្ដ្រីជាន់ខ្ពស់ចិនទៀតផង។
គួរដឹងថា កាលពីថ្ងៃទី១២ ខែកញ្ញាកន្លងទៅ វិមានកីឡដ្ឋាននៃពហុកីឡដ្ឋានជាតិមរតកតេជោបានរៀបចំពិធីប្រគល់-ទទួលរួចមកហើយ ដែលបានធ្វើឡើងក្រោមអធិបតីភាពដ៏ខ្ពង់ខ្ពស់របស់សម្ដេចតេជោនាយករដ្ឋមន្ដ្រី ហ៊ុន សែន និងវត្តមានឯកឧត្តម វ៉ាង យី ទីប្រឹក្សារដ្ឋ និងជារដ្ឋមន្ដ្រីការបរទេសចិន បន្ទាប់ពីសំណង់ដ៏អស្ចារ្យនេះបានបញ្ចប់ការសាងសង់រួចរាល់ ១០០% កាលពីពាក់កណ្ដាលខែសីហា ឆ្នាំ២០២១ កន្លងទៅ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
