រដ្ឋមន្ត្រីប្រចាំខេត្ត Khyber Pakhtunkhwa លោក Nadeem Aslam Chaudhry បាននិយាយថា ខ្មាន់កាំភ្លើងបានបើកការបាញ់ប្រហារទៅលើរថយន្តដឹកអ្នកដំណើរ នៅក្នុងតំបន់កុលសម្ព័ន្ធមួយ នាភាគពាយ័ព្យប្រទេសប៉ាគីស្ថាន នៅថ្ងៃព្រហស្បតិ៍ (ទី២១ ខែវិច្ឆិកា) នេះ ដោយបានសម្លាប់មនុស្សយ៉ាងហោចណាស់ ៣៨នាក់ និងរបួស ២៩នាក់ ។

លោក Chaudhry បាននិយាយថា ក្នុងចំណោមអ្នកស្លាប់ នៅក្នុងការវាយប្រហារនេះ ដែលបានកើតឡើងនៅក្នុងតំបន់កុលសម្ព័ន្ធ Kurram មានស្ត្រី និងកុមារម្នាក់ ដោយបានបន្ថែមថា «វាជាសោកនាដកម្មដ៏ធំមួយ ហើយចំនួនអ្នកស្លាប់ ទំនងជាកើនឡើង»។

ភ្លាមៗនេះ មិនទាន់មានក្រុមណាអះអាងទទួលខុសត្រូវ ចំពោះហេតុការណ៍បាញ់ប្រហារនេះនៅឡើយទេ។ នៅក្នុងសេចក្តីថ្លែងការណ៍មួយ ប្រធានាធិបតី លោក Asif Ali Zardari បានថ្កោលទោសយ៉ាងខ្លាំងក្លា ចំពោះការវាយប្រហារលើរថយន្តដឹកអ្នកដំណើរនេះ។

គួរបញ្ជាក់ថា ភាពតានតឹងបានកើតមានអស់រយៈពេលជាច្រើនទសវត្សរ៍មកហើយ រវាងក្រុមប្រដាប់អាវុធអ៊ិស្លាមនិកាយស៊ីអ៊ីត និងនិកាយស៊ុននី ជុំវិញជម្លោះដីធ្លី ក្នុងតំបន់កុលសម្ព័ន្ធ ដែលជាប់ព្រំដែនប្រទេសអាហ្វហ្គានីស្ថាន៕