កងទ័ពអាកាសទីក្រុងគីវ និយាយថា រុស្ស៊ី បានវាយប្រហារដោយមីស៊ីលបាលីស្ទិកអន្តរទ្វីប ICBM អំឡុងការវាយប្រហារលើទីក្រុង Dnipro របស់អ៊ុយក្រែននាថ្ងៃព្រហស្បតិ៍នេះ គឺជាការប្រើប្រាស់ក្នុងសង្រ្គាមនូវអាវុធលើកដំបូងដែលរចនាឡើង ដើម្បីបើកការវាយប្រហារនុយក្លេអ៊ែររយៈចម្ងាយឆ្ងាយ ។

ការវាយប្រហារនេះ បើសិនជាបានបញ្ជាក់ វានឹងឆ្លុះបញ្ចាំងពីភាពតានតឹងកើនឡើងខ្លាំង ក្នុងសង្រ្គាមរយៈពេល ៣៣ខែ ក្រោយអ៊ុយក្រែន បាញ់មីស៊ីលសហរដ្ឋអាមេរិក និងអង់គ្លេសលើគោលដៅនៅក្នុងប្រទេសរុស្ស៊ី នាសប្តាហ៍នេះ បើទោះបីជាមានការព្រមានដោយទីក្រុងម៉ូស្គូថា ពួកគេនឹងមើលឃើញវិធានការដូចជាការឡើងកម្តៅសង្រ្គាមក៏ដោយ ។

ក្រុមអ្នកជំនាញសន្តិសុខ និយាយថា វានឹងក្លាយជាការប្រើប្រាស់យោធាលើកដំបូងនូវមីស៊ីលអន្តរទ្វីប ។ ICBM គឺជាអាវុធយុទ្ធសាស្រ្ត ដែលត្រូវបានរចនាឡើងដើម្បីបញ្ជូនក្បាលគ្រាប់នុយក្លេអ៊ែរ ហើយវាគឺជាផ្នែកមួយដ៏សំខាន់នៃការធ្វើឲ្យញញើតនុយក្លេអ៊ែររបស់រុស្ស៊ី ។

ប្រធានាធិបតីអ៊ុយក្រែនលោក Volodymyr Zelenskiy បាននិយាយនៅក្នុងសេចក្តីថ្លែងការណ៍ជាវីដេអូថា នៅថ្ងៃនេះ មាននូវមីស៊ីលថ្មីរបស់រុស្ស៊ី ។ លក្ខខណៈទាំងអស់ ទាំងល្បឿន រយៈកម្ពស់ វាគឺជាមីស៊ីលបាលីស្ទិកអន្តរទ្វីប ។ ការស៊ើបអង្កេតរបស់អ្នកជំនាញ បច្ចុប្បន្នកំពុងធ្វើឡើង ។

កងទ័ពអាកាសអ៊ុយក្រែន និយាយថា មីស៊ីលនេះ ត្រូវបានបាញ់ចេញពីតំបន់ Astrakhan របស់រុស្ស៊ី មានចម្ងាយជាង ៧០០គ.មពីទីក្រុង Dnipro ស្ថិតនៅភាគកណ្តាលឈាងខាងកើតអ៊ុយក្រែន ។ ពួកគេពុំបានបញ្ជាក់ឲ្យបានច្បាស់លាស់ថាវាជាក្បាលគ្រាប់ប្រភេទណានោះទេដែលមីស៊ីលមាន ឬតើថាវាគឺជាមីស៊ីលប្រភេទណានោះទេ ។ គ្មាននូវការលើកឡើងថា វាមានបំពាក់ដោយនុយក្លេអ៊ែរនោះដែរ ។

នៅពេលសួពីសេចក្តីថ្លែងការណ៍របស់កងទ័ពអាកាសអ៊ុយក្រែន អ្នកនំាពាក្យវិមានក្រឹមឡាំង លោក Dmitry Peskov និយាយប្រាប់ក្រុមអ្នកសារព័ត៌មានថា ឲ្យទាក់ទងយោធារុស្ស៊ី ដើម្បីសុំសេចក្តីអត្ថាធិប្បាយ ។

សារព័ត៌មាន Ukrainska Pravda ដែលមានមូលដ្ឋាននៅទីក្រុងគីវ បានលើកឡើងពីប្រភពមិនបញ្ចេញឈ្មោះ រាយការណ៍ថា មីស៊ីលនេះគឺជាប្រភេទមីស៊ីល RS-26 Rubezh គឺជាមីស៊ីលបាលីស្ទិកអន្តរទ្វីបដើរដោយថាមពលឥន្ធនៈរឹង ជាមួយនឹងរយៈចម្ងាយ ៥.៨០០គ.ម ។

យោងតាមការអះអាងរបស់មន្ទីរសិក្សាយុទ្ធសាស្រ្តអន្តរជាតិ បានឲ្យដឹងថា មីស៊ីល RS-26 បានបាញ់សាកល្បងដោយជោគជ័យលើកដំបូងកាលពីឆ្នាំ ២០១២ ហើយវាមានបណ្តោយប្រវែងប្រហែល ១២ម៉ែត្រ និងទម្ងន់ ៣៦តោន ។ ពួកគេនិយាយថា វាអាចពាំក្បាលគ្រាប់នុយក្លេអ៊ែរទម្ងន់ ៨០០គ.ម ៕