លោកនាយករដ្ឋមន្ត្រី Benjamin Netanyahu បានហៅទង្វើរបស់តុលាការឧក្រិដ្ឋកម្មអន្តរជាតិថាជាការប្រឆាំងពលរដ្ឋជ្វីហ្វ កាលពីថ្ងៃព្រហស្បតិ៍២១ វិច្ឆិកា សប្ដាហ៍នេះ បន្ទាប់ពីបានចេញដីកាចាប់ខ្លួនរូបលោក និងអតីតរដ្ឋមន្ត្រីការពារជាតិរបស់លោក ដោយបានប្តេជ្ញាថាសកម្មភាពនេះ នឹងមិនអាចរារាំងលោកមិនឲ្យការពារអ៊ីស្រាអែលបានឡើយ។

មេដឹកនាំបក្សប្រឆាំងអ៊ីស្រាអែល លោក Yair Lapid ក៏បានរិះគន់ដីកាចាប់ខ្លួននេះដែរ ដោយចោទប្រកាន់តុលាការថាផ្តល់រង្វាន់ដល់អំពើភេរវកម្ម។

ដីកាចាប់ខ្លួនលោក Netanyahu និងលោក Gallant ត្រូវបានចេញដោយមានការសង្ស័យអំពីឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្គ្រាមដែលបានប្រព្រឹត្តនៅក្នុងដែនដីហ្កាហ្សា ចាប់តាំងពីការវាយប្រហាររបស់ក្រុមហាម៉ាសកាលពីថ្ងៃទី ៧ខែតុលា ឆ្នាំ ២០២៣ លើអ៊ីស្រាអែលសម្លាប់មនុស្ស១.២០០នាក់ ។នៅសប្ដាហ៍នេះអ្នកស្លាប់សរុបនៅហ្កាហ្សាកើនឡើងជាង៤៤.០០០នាក់។

លោក Netanyahu បាននិយាយនៅក្នុងសេចក្តីថ្លែងការណ៍ជាវីដេអូមួយថា គ្មានការសម្រេចចិត្តប្រឆាំងអ៊ីស្រាអែលណាមួយនឹងរារាំងយើងបានទេ ហើយក៏នឹងមិនអាចរារាំងយើងមិនឲ្យបន្តការពារប្រទេសរបស់យើងតាមគ្រប់មធ្យោបាយបានដែរ ។ លោកបានប្តេជ្ញាថាយើងនឹងមិនទទួលសម្ពាធទេ។

លោក Netanyahu បានប្រៀបធៀបការសម្រេចចិត្តរបស់តុលាការ ICC ទៅនឹងការកាត់ក្តីតាមសម័យសតវត្សរ៍ទី១៩ ដែលមេទ័ពជនជាតិជ្វីហ្វបារាំងលោក Alfred Dreyfus ត្រូវបានកាត់ទោសដោយអយុត្តិធម៌ពីបទក្បត់ជាតិ។

លោកថាអ៊ីស្រាអែលទាត់ចោលដោយស្អប់ខ្ពើមចំពោះទង្វើមិនសមហេតុផល និងមិនពិត និងការចោទប្រកាន់ដែលបានធ្វើឡើងប្រឆាំងខ្លួន។ លោកបាននិយាយថា ចៅក្រមត្រូវបានជំរុញដោយភាពស្អប់ខ្ពើមខាងសាសនាប្រឆាំងនឹងអ៊ីស្រាអែល៕