​បាល់ទាត់៖ ​ក្រុម​ញញួរ​ធំ West Ham បាន​បោះ​មួយ​ជំ​ហ៊ាន​ដ៏​មាន​សារសំខាន់​ក្នុង​ដំណើរ​ឡើង​ជុំ​បន្ត​នៃ​ក្រប​ខណ្ឌ UEFA Europa League ក្រោយ​យកឈ្នះ Genk ៣-០ ដែល​ជា​ជ័យជំនះ​បី​ប្រកួត​ផ្ទួនៗ​ក្នុង​ពូ​ល H​។ ​​ក្រុម​របស់លោក David Moyes មានការ​ឱកាស​គ្រប់គ្រង​បាល់​ច្រើន​ក្នុង​ការប្រកួត​នេះ ​តែ​គ្រាប់​នាំមុខ​ត្រូវ​រង់ចាំ​ដល់ចុង​វគ្គ​ទី១ នាទី​ទី៤៥+១ ទើប Craig Dawson តែ​ត​បញ្ចូល​ទី​នាំមុខ ១-០​។

​​ឈានចូល​វគ្គ​ទី២ West Ham ក៏​រកបាន​ពីរ​គ្រាប់​បន្ថែម​ដោយ​គ្រាប់​បាល់​របស់ Issa Diop និង Jarrod Bowen ពីរ​នាទី​ជាប់​គ្នា​នៅ​នាទី​ទី៥៧ និង ៥៨​។ ​​ជ័យជំនះ​នេះ​ធ្វើឱ្យ West Ham រក្សា​ស្ថិតិ​ឈ្នះ ១០០% ក្នុង​ពូ​ល H នេះ​មាន ៩ពិន្ទុ​ពេញ​នាំមុខ​ដាច់​ក្រុម​លេខ២ លេខ៣ និង​លេខ៤ រួមមាន Dynamo Zagreb, Rapid Vienna និង KRC Genk ដែល​សុទ្ធ​តែមាន ៣ពិន្ទុ​ដូចគ្នា​។ ​​ចំណែក​លទ្ធផល​សំខាន់ៗ​ផ្សេងទៀត​នៅ​ក្របខណ្ឌ UEFA Europa Conference League, Spurs ចាញ់​នៅ​ទឹកដី​ហូ​ឡង់ Vitesse ១-០ ដោយ​គ្រាប់​បាល់​របស់ Maximilian Wittek​។ ​​លទ្ធផល​នេះ Spurs នៅតែ​បន្ត​នាំមុខគេ​ក្នុង​ពូ​ល G មាន ៤ពិន្ទុ​ស្មើគ្នា​ជាមួយ Rennes ដែល​យកឈ្នះ​នៅ​ទឹកដី NS Mura ២-១ យប់មិញ​។

​​ចំណែក​ក្រុម​របស់លោក Jose Mourinho, AS Roma បាន​រង​បរាជ័យ​ធ្ងន់​ករ​នៅ​ទឹកដី Bodo Glimt ៦-១ មិនគួរ​ឱ្យ​ជឿ​។ ​​ត្រឹម​វគ្គ​ទី១ Bodo Glimt នាំមុខ ២-១ ខណៈ​ចូល​វគ្គ​ទី២ លោក Jose Mourinho បាន​ផ្លាស់ប្តូរ​កីឡាករ​ ៣នាក់តែ​លទ្ធផល​បែ​ជា​កាន់តែ​ផុង​ជ្រៅ​ដោយ​ម្ចាស់ផ្ទះ​បន្ថែម ៤គ្រាប់​ទៀត​យកឈ្នះ ៦-១ នៅ​ទីបញ្ចប់​។ យ៉ាងណាក្តី​លទ្ធផល​នេះ Roma នៅតែ​នាំមុខគេ​ក្នុង​ពូ​ល C នេះ​ដដែល​មាន ៦ពិន្ទុ​ខណៈ Bodo Glimt មាន ៤ពិន្ទុ​៕

​ ​

​អត្ថបទ​៖​នាង សុភា​វុ​ធ