ក្រុមអង្គការមនុស្សធម៌របស់អង្គការសហប្រជាជាតិ បាននិយាយកាលពីថ្ងៃព្រហស្បតិ៍ថា បទបញ្ជាជម្លៀស និងការវាយប្រហារតាមអាកាស បានបង្ខំឲ្យមនុស្សជាង៨៨០.០០០នាក់ ភៀសខ្លួនចេញពីលំនៅឋានរបស់ពួកគេនៅក្នុងប្រទេសលីបង់ ដោយមនុស្សជាង ៥០០.០០០នាក់ បានភៀសខ្លួនចូលទៅក្នុងប្រទេសស៊ីរី។ ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយថា អ្នកទាំងឡាយដែលនៅសេសសល់ក្នុងប្រទេសលីបង់ ប្រឈមមុខនឹងសន្តិសុខស្បៀងកាន់តែធ្លាក់ចុះយ៉ាប់យ៉ឺន។

អង្គការទេសន្តប្រវេសន៍អន្តរជាតិ បានរាយការណ៍ថា មនុស្សជាង៨៨០.០០០នាក់ បានភៀសខ្លួននៅខាងក្នុងប្រទេស រួមទាំងជនអន្តោប្រវេសន៍ជាង២០.០០០នាក់ ត្រូវបានបង្ខំឱ្យភៀសខ្លួនចេញទាំង ពីលំនៅឋាន និងកន្លែងធ្វើការ។

ទីភ្នាក់ងារជនភៀសខ្លួនរបស់អង្គការសហប្រជាជាតិ (UNHCR) បានរាយការណ៍ថា មនុស្សជាង ៥០០.០០០នាក់ បានចាកចេញពីប្រទេសលីបង់ទៅកាន់ប្រទេសស៊ីរី ហើយជាងពាក់កណ្តាលគឺជាកុមារ។

អង្គការ UNHCR កំពុងជួយដល់ពួកគេ ដោយផ្តល់ការគាំទ្រផ្នែកចិត្តសាស្រ្ត ជួយដោះស្រាយការរបួសផ្លូវចិត្ត និងផលប៉ះពាល់ផ្លូវចិត្តពីការជម្លៀសខ្លួនចេញ។

កម្មវិធីស្បៀងអាហារពិភពលោក(WFP) និងអង្គការស្បៀងអាហារនិងកសិកម្ម(FAO) ព្រមានថាសន្តិសុខស្បៀងនៅក្នុងប្រទេសលីបង់ ត្រូវបានគេរំពឹងថានឹងកាន់តែធ្លាក់ចុះធ្ងន់ធ្ងរ។

អង្គការ WFP និងអង្គការហ្វៅ(FAO) និយាយថា «ការកើនឡើងនៃជម្លោះដែលនៅបន្ត ចាប់តាំងពីខែកញ្ញា ឆ្នាំ២០២៤ បានរំខានយ៉ាងខ្លាំងដល់ខ្សែច្រវ៉ាក់ផ្គត់ផ្គង់ និងធ្វើឱ្យមានអសន្តិសុខស្បៀងកាន់តែធ្ងន់ធ្ងរ ដែលបច្ចុប្បន្ននេះ ប៉ះពាល់ដល់មនុស្សជាង១,២លាននាក់»។