សហរដ្ឋអាមេរិក ជឿជាក់ថា រុស្ស៊ីបានបាញ់មីស៊ីលបាលិស្ទីករយៈចម្ងាយមធ្យមថ្មី (IRBM) ដែលមិនធ្លាប់មានពីមុនមក កាលពីថ្ងៃព្រហស្បតិ៍ (២១ វិច្ឆិកា) ក្នុងការវាយប្រហាររបស់ខ្លួនលើអ៊ុយក្រែន ដែលជាការបង្អួតពីកម្លាំងមីស៊ីលថ្មីរបស់ខ្លួន ខណៈអ្នកវិភាគព្រមានថាអាចមានផលប៉ះពាល់ដល់ប្រព័ន្ធការពារមីស៊ីលរបស់អឺរ៉ុប។

យោធាអាមេរិក និយាយថា បែបបទរចនាមីស៊ីលថ្មីរបស់រុស្ស៊ីនេះគឺផ្អែកលើមីស៊ីលអន្តរទ្វីប RS-26 Rubezh រយៈចម្ងាយឆ្ងាយ (ICBM) របស់ទីក្រុងមូស្គូ ដោយមីស៊ីលនេះគឺជាការពិសោធន៍ ហើយរុស្ស៊ីទំនងជាមានត្រឹមតែមួយចំនួនតូចប៉ុណ្ណោះ។

កម្លាំងទ័ពអាកាសរបស់អ៊ុយក្រែន ដំបូងឡើយបាននិយាយថា មីស៊ីលរុស្ស៊ីនេះជាប្រភេទរយៈចម្ងាយឆ្ងាយ ICBM ដែលបង្កឱ្យមានក្ដីបារម្ភពីការកើនឡើងដ៏ធំនៅក្នុងសង្គ្រាមជាច្រើនឆ្នាំ។ មន្ត្រីអាមេរិកលើកឡើងថា ខណៈពេលដែលការបាញ់បង្ហោះមីស៊ីលបាលិស្ទិករយៈចម្ងាយមធ្យម IRBM បញ្ជូនសញ្ញាគំរាមកំហែងតិចជាង ICBM ក៏ការវាយប្រហារនេះនៅតែជាគ្រោះថ្នាក់ដ៏ធំ។

មន្ទីរបញ្ចកោណនិយាយថា មីស៊ីលនោះត្រូវបានបាញ់ដោយក្បាលគ្រាប់ធម្មតា ប៉ុន្តែបន្ថែមថា ទីក្រុងមូស្គូ អាចកែប្រែវាបានប្រសិនបើខ្លួនចង់។ ប្រធានាធិបតីរុស្ស៊ី លោក វ្ល៉ាឌីមៀ ពូទីន ក្នុងសុន្ទរកថាតាមទូរទស្សន៍ បានទទួលស្គាល់ថា ទីក្រុងមូស្គូ បានវាយប្រហារទីតាំងយោធាអ៊ុយក្រែន ដោយមីស៊ីលបាលិស្ទិកថ្មី ដែលហៅថា "អូរ៉េស្នីក" (Oreshnik)៕